பார்த்திபன் இயக்கத்தில் சாந்தனு!

பார்த்திபன் இயக்கும் கோடிட்ட இடங்களை நிரப்புக படத்தில் சாந்தனு பாக்யராஜ் மற்றும் பார்வதி மேனன் நடிக்கின்றனர்.

ஹீரோ மற்றும் ஹீரோயின் யார் என்று அறிவிக்காமலேயே படத்தின் சில பகுதிகளை ஷூட் செய்து கொண்டிருந்த படக்குழு தற்போது அதிகாரப்பூர்வமாக அறிவித்துள்ளது. இது குறித்து நடிகரும், இயக்குநருமான பார்த்திபன் கூறும் போது, பெண்களை கவரும் ஒரு கதாப்பாத்திரத்தில் சாந்தனு நடிக்க இருக்கிறார். இதற்கு புதுமுகம் சரியாக இருப்பார்கள் என்றாலும், சாந்தனுவை வைத்து இயக்க வேண்டும் என்பது என் விருப்பம், கடமையும் கூட. தமிழ் சினிமாவில் உயர்ந்த நிலையை அடைய சாந்தனு முயற்சித்து வருகிறார். ஆனால் ஏனோ சில காரணங்களால் அது தள்ளிப்போகிறது. அதனால் இந்தப்படத்தில் சாந்தனுவை இயக்க முடிவுசெய்தேன். அவரின் வெற்றிக்கு பின் நான் இருக்கிறேன் என்றால் அது எனக்கு பெருமையாகும். இது என் குரு பாக்யராஜ் அவர்களுக்கு நான் கொடுக்கும் மரியாதையாகும் என்றார்.

அதே போல் பார்வதி ஏற்ற கதாப்பாத்திரத்தை அமைத்துள்ளதாகவும் பார்த்திபன் கூறியுள்ளார். ஆனால் பார்வதி சாந்தனுவின் ஜோடியா, இல்லையா என்பதை கூற மறுத்துவிட்டார். படத்தின் பெயரே கோடிட்ட இடங்களை நிரப்புக என்பதால், திரையில் பார்த்து தெரிந்துகொள்ளவேண்டும் என்று அவருக்கே உரிய தனித்துவ பதில் அளித்தார்.