டார்லிங் அரசியலுக்கு வரணும்: ரஜினியைக் கொஞ்சும் பாஜக

நடிகர் ரஜினிகாந்த் அரசியலுக்கு வர இதுதான் சரியான தருணம் என்று நடிகரும் பாஜக பிரமுகர்களில் ஒருவருமான சத்ருகன் சின்ஹா கூறியுள்ளார்.

கடந்த மே 15ஆம் தேதி நடிகர் ரஜினிகாந்த் தனது ரசிகர்களைச் சந்தித்துப் பேசினார். எட்டு ஆண்டுகளுக்குப் பிறகு ரசிகர்களைச் சந்தித்து புகைப்படம் எடுத்துக்கொண்டுள்ள அவர், அந்நிகழ்ச்சியில் பேசியது விவாதப்பொருளாக மாறியுள்ளது.

அரசியலில் ஈடுபட ஆண்டவன் தீர்மானித்தால் அது நடைபெறும் என்று அவர் கூறியது அவரது அரசியல் பிரவேசம் குறித்த சூசகமான அறிவிப்பாக இருக்கலாம் என்று கூறப்படுகிறது.

இந்நிலையில், நடிகர் ரஜினிகாந்த் அரசியலுக்கு வர இதுதான் சரியான தருணம் என்று நடிகரும் பாஜக பிரமுகர்களில் ஒருவருமான சத்ருகன் சின்ஹா கூறியுள்ளார். “டைடானிக் மெகாஸ்டார், மக்களின் டார்லிங், எங்களுடைய நண்பர், தமிழகத்தின் சூப்பர் ஹீரோ ரஜினிகாந்த் மக்களைச் சந்திப்பதற்கு இதுவே சரியான நேரம்” என்று அவர் தனது ட்விட்டர் பக்கத்தில் குறிப்பிட்டுள்ளார்.