சினேகா நடித்த கேரக்டரில் ஸ்ரேயா!

தமிழில் நடிகை சினேகா நடித்த படத்தில் இந்தியில் அதே கேரக்டரில் நடிகை ஸ்ரேயா நடிக்கவுள்ளார்.
தென்னிந்திய சினிமாவில் வில்லனாக நடித்து வரும் பிரகாஷ்ராஜ், சமீபகாலமாக பாலிவுட்டில் காலூன்றி ரொம்ப பிஸியான நடிகராகி விட்டார். மேலும், நடிகராக மட்டுமே இல்லாமல், தனது டூயட் மூவ்ஸ் மூலம் அவ்வப்போது தரமான படங்களையும் தயாரித்து வெளியிட்டு வருபவர், ‘தோனி‘, ‘உன் சமையல் அறையில்‘ போன்ற பாடங்களை தானே தயாரித்து இயக்கி நடித்தார். அந்த படங்கள் பெரிய அளவில் வெற்றி பெறவில்லை என்றபோதும், பிரகாஷ்ராஜ்க்கு நல்ல பெயரை ஏற்படுத்திக்கொடுத்தன.
இந்த நிலையில், கடந்த ஆண்டில் தெலுங்கு, கன்னடத்தில் தலா ஒரு படத்தை இயக்கிய பிரகாஷ்ராஜ், தற்போது ஒரு இந்தி படத்தை இயக்கவும் தயாராகிக்கொண்டிருக்கிறார். தமிழில் தான் இயக்கிய ‘உன் சமையல் அறையில்’ படத்தையே இந்தியில் ரீமேக் செய்கிறாராம் அவர்.
அதேசமயம் அந்த படத்தை தயாரித்து இயக்குவதோடு நிறுத்திக்கொண்டு இந்தி நடிகர் நானா படேகரை தான் நடித்த வேடத்தில் நடிக்க வைக்கும் பிரகாஷ்ராஜ், தமிழில் சினேகா நடித்த வேடத்தில் ஸ்ரேயாவை நடிக்க வைக்கிறாராம். இந்தியில் தனக்கு பெரிதாக மார்க்கெட் இல்லாத இந்த நேரத்தில் பிரகாஷ்ராஜ் தனக்கு கதாநாயகி வாய்ப்பு கொடுத்திருப்பதால் மிகுந்த உற்சாகத்தில் இருக்கிறாராம் ஸ்ரேயா. ‘த்ரிஷ்யம்‘ இந்தி ரீமேக் கிற்கு பிறகு ஸ்ரேயா நடிக்கும் இந்தி படம் இதுவாகும்.