Sibiraj : ‘ஷிவா’ படத்தில் காட்டு இலாகா அதிகாரியாக நடிக்கும் சிபிராஜ்!

தமிழ் சினிமாவில் முன்னணி நடிகராக வரவேண்டுமென்று போராடி வருபவர்களில் ஒருவர்நடிகர் சிபிராஜ். இவர் நடித்த படங்களில் இவருக்கு பெயர் வாங்கித் தந்த படம் ‘நாய்கள் ஜாக்கிரதை’. அதையடுத்து அவர் நடிப்பில் வெளியான ‘போக்கிரிராஜா’, ‘ஜாக்சன் துரை’, ‘கட்டப்பாவ காணோம்’, ‘சத்யா’ உள்ளிட்ட படங்கள் வெற்றி பெறவில்லை.

தற்போது சிபிராஜ் ‘ரங்கா’ என்ற படத்தில் நடித்து வருகிறார். இந்தப் படத்தில் இவருக்கு ஜோடியாக நிகிலா விமல் நடிக்கிறார். மேலும் படத்தில் காமெடி நடிகர் சதீஷ் உட்பட பலர் நடிக்கின்றனர். இந்தப் படத்தை டி.எல்.வினோத் இயக்கி வருகிறார்.

இதையடுத்து நடிகர் சிபிராஜ், தரணிதரன் இயக்கத்தில் ‘ஷிவா’ என்ற படத்தில் நடிக்கவுள்ளார். தரணிதரன், ஏற்கெனவே ‘பர்மா’, ‘ஜாக்சன் துரை’, ‘ராஜா ரங்குஸ்கி’ ஆகிய படங்களை இயக்கியுள்ளார். மேலும் ‘ஷிவா’ படத்தில் நடிக்கவுள்ள மற்ற நடிகர் நடிகைகள், தொழில்நுட்ப கலைஞர்கள் தேர்வு நடந்து வருகிறது.

தற்போது சிபிராஜ் நடிக்கவுள்ள ‘ஷிவா’ படத்தில், புலி முக்கிய கேரக்டராக இருக்கிறது. இதில் சிபிராஜ், காட்டு இலாகா அதிகாரியாக நடிக்கிறார். மனிதர்களை கொன்று தின்னும்புலியுடன் அவர் மோதுவது தான் படத்தின் கதை. முழு படமும் அடர்ந்த காடுகளில் படமாக இருக்கிறது.