ஒரே நாளில் வெளியாகும் சிம்பு - தனுஷ் படங்கள்: அதிரடிக்கு தயாராகும் ரசிகர்கள்!

'மாநாடு' சிம்புவின் மிகப்பெரிய கம்பேக் படமாக அமைந்துள்ளது. சுரேஷ் காமாட்சி தயாரிப்பில், வெங்கட் பிரபு இயக்கத்தில் உருவான இந்தப்படத்தின் ரிலீசுக்காக வெகு நாட்களாக ரசிகர்கள் காத்திருந்தினர். பலவித தடைகளுக்கு மத்தியில் நவம்பர் மாதம் 25 ஆம் தேதி திரையரங்குகளில் வெளியான இந்தப்படம் ரசிகர்கள் மத்தியில் அமோக வரவேற்பினை பெற்றது.

'மாநாடு' படத்தில் சிம்புவிற்கு ஜோடியாக கல்யாணி நடித்துள்ளார். இவர்களுடன் எஸ்ஏ சந்திரசேகர், பாரதிராஜா, எஸ்.ஜே.சூர்யா, பிரேம்ஜி, அரவிந்த் ஆகாஷ், ஒய்.ஜி.மகேந்திரன், வாகை சந்திர சேகர், டேனியல் பாலாஜி, மனோஜ், பிரேம்ஜி, உதயா மற்றும் கருணாகரன் உள்ளிட்ட நட்சத்திர பட்டாளங்களே இந்தப்படத்தில் நடித்துள்ளனர்.

யுவன் ஷங்கர் ராஜா இசையமைத்துள்ள இந்தப்படத்தின் இசை வெளியீட்டு விழாவில் 'நெறைய பிரச்சனை கொடுக்குறாங்க. அதெல்லாம் நான் பார்த்துக்கிறேன். என்னை மட்டும் நீங்க பார்த்துகோங்க' என பேசியது ரசிகர்கள் அனைவரையும் கலங்க வைத்தது. படத்தின் ரிலீசுக்கு முந்தைய நாளும் படம் வெளியாவதில் சிக்கல் ஏற்பட்டது. பின்னர் ஒரு வழியாக திட்டமிட்டபடி கடந்த நவம்பர் மாதம் 25 ஆம் தேதி திரையரங்குகளில் வெளியானது 'மாநாடு' படம்.

ஆண்டவன் இருக்கான்.. தைரியமா இரும்மா: ரசிகரின் மகளுக்கு ஆறுதல் கூறிய ரஜினி!
இந்நிலையில் ’மாநாடு’ படத்தின் டிஜிட்டல் ரிலீஸ் குறித்த அதிகாரப்பூர்வ அறிவிப்பு வெளியாகியுள்ளது. அதன்படி வரும் டிசம்பர் 24ஆம் தேதி கிறிஸ்துமஸ் தினத்துக்கு முந்தைய நாள் சோனி லைவ் ஓடிடி தளத்தில் படம் வெளியாக இருப்பதாக அறிவிக்கப்பட்டுள்ளது.

அதே போல் தனுஷின் 'அத்ரங்கி ரே' படமும் டிஸ்னி + ஹாட் ஸ்டாரில் வரும் டிசம்பர் 24 ஆம் தேதி வெளியாக உள்ளது. ஆனந்த்.எல்.ராய் இயக்கியுள்ள இந்தப்படத்தில் அக்‌ஷய் குமார், சாரா அலிகானுடன் இணைந்து தனுஷ் நடித்துள்ளார். சிம்பு மற்றும் தனுஷின் படங்கள் ஒரே நாளில் ஓடிடி தளத்தில் வெளியாக உள்ளது ரசிகர்கள் மத்தியில் உற்சாகத்தை ஏற்படுத்தியுள்ளது.