ஒருவர் மட்டுமே நடிக்கும் படம் ‘கார்கில்’!

‘கார்கில்’ என்ற படத்தில் ஒருவர் மட்டுமே நடிப்பதாக திரைக்கதை அமைக்கப்பட்டுள்ளது.

‘கார்கில்’ என்ற படத்தை சிவானி செந்தில் இயக்கி வருகிறார். படத்தில் குறைந்த பட்சம் 4 பாட்டு, 4 காட்சிகளாவது இருந்தால் தான் ஹீரோயினாக நடிப்பேன் என்பார்கள் பல நடிகைகள். ஆனால் ‘கார்கில்’ படத்தில் நடிகை பிரேமா சில நிமிடம் மட்டுமே நடித்திருக்கிறார்.

இந்தப் படம் பற்றி இயக்குனர் சிவானி செந்தில் கூறுகையில், ‘‘சென்னையிலிருந்து பெங்களூர் வரை காரில் செல்லும் ஒருவர் மட்டுமே நடிக்கும் கதையாக இதன் திரைக்கதை அமைக்கப்பட்டது. அப்பாத்திரத்தில் ஜிஷ்னு நடித்திருக்கிறார். சில நிமிடங்களுக்கு மட்டுமே ஹீரோயின் இருந்தால் போதும் என்ற நிலையில் தான் நடிகை பிரேமாவை தேர்வு செய்து நடிக்க வைத்தோம்.

இக்காட்சி முடிந்ததும் அவருடன் போனில் உரையாடுவது போல் தான் மற்ற காட்சிகள் இருக்கும். படத்திற்கு கணேஷ் பரம ஹம்சா ஒளிப்பதிவு செய்துள்ளார். விக்னேஷ் பாய் இசையமைத்துள்ளார். படத்தை சுபா செந்தில் தயாரித்து வருகிறார்.இந்தப் படத்தின் பாடல்களை சமீபத்தில் தயாரிப்பாளர் கலைப்புலி எஸ்.தாணு வெளியிட்டார்’’ என்றார்.