சிவகார்த்திகேயனின் அடுத்த படம்.. யாருமே எதிர்பார்க்காத கூட்டணி?

சிவகார்த்திகேயன் நடிப்பில் தற்போது 2 படங்கள் தயாராகி வருகின்றன. கோலமாவு கோகிலா படப் புகழ் நெல்சன் இயக்கத்தில் டாக்டர் மற்றும் ரவிக்குமார் இயக்கத்தில் அயலான் என்ற படம் ஆகியவை இவர் கைவசம் இருக்கின்றன. இந்த இரண்டு படங்களின் ஷூட்டிங்கும் கொரோனா பரவல் காரணமாக தடைப்பட்டு இருக்கும் சூழலில் சிவகார்த்திகேயனின் அடுத்த படம் பற்றி சில தகவல்கள் வந்த வண்ணம் இருக்கின்றன.

இந்நிலையில் தற்போது இயக்குனர் தேசிங்கு பெரியசாமி உடன் சிவகார்த்திகேயன் அடுத்த படத்திற்காக கூட்டணி சேர உள்ளார் என தகவல் பரவி வருகிறது. இந்த வருடத் துவக்கத்தில் வெளியான கண்ணும் கண்ணும் கொள்ளையடித்தால் என்ற படத்தினை இயக்கியவர் தான் தேசிங்கு பெரியசாமி. துல்கர் சல்மான் மற்றும் ரீத்து வர்மா, ரக்ஷன் உள்ளிட்டவர்கள் நடித்திருந்த அந்த படம் நல்ல வரவேற்பை பெற்றது. விமர்சன ரீதியாகவும், வசூல் ரீதியாகவும் அந்த படத்திற்கு நல்ல வரவேற்பு கிடைத்தது குறிப்பிடத்தக்கது.

அந்த படத்தை பார்த்து விட்டு சூப்பர் ஸ்டார் ரஜினிகாந்த் தேசிங்கு பெரியசாமியை போனில் அழைத்து பாராட்டி இருந்தார். தனக்காக ஒரு கதை தயார் செய்யும் படி ரஜினிகாந்த் கூறியிருந்தது குறிப்பிடத்தக்கது. இந்நிலையில் தற்போது அவர் எழுதிவரும் கதை சிவகார்த்திகேயனுடன் கூட்டணி சேரத்தான் என தகவல் பரவி வருகிறது. இருப்பினும் இது பற்றிய அதிகாரப்பூர்வ தகவல் எதுவும் தற்போது வரை வரவில்லை.

தேசிங் பெரியசாமி தற்போது கதை எழுதுவதில் பிஸியாக இருக்கின்றார் என்றும் அது முடித்த பிறகு தான் அவர் தயாரிப்பாளரை அணுக இருக்கிறார் என்றும் கூறப்படுகிறது. இருப்பினும் அதிகாரபூர்வ அறிவிப்பு வந்தால் தான் இந்த படம் உறுதி ஆகும்.

அது மட்டுமின்றி லைகா நிறுவனத்தின் தயாரிப்பில் சிவகார்த்திகேயன் ஒரு படத்தில் நடிக்க ஒப்புக்கொண்டிருக்கிறார் என கூறப்படுகிறது. அந்த படத்தினை இயக்குனர் விக்னேஷ் சிவன் இயக்க இருந்தார். ஆனால் தற்போது அவருக்கு பதிலாக ஒரு புது முக இயக்குனர் ஒப்பந்தம் செய்யப்பட்டு இருப்பதாக உறுதிப்படுத்தாத தகவல் வெளியாகி இருக்கிறது என்பது குறிப்பிடத்தக்கது.

விக்னேஷ் சிவன் அடுத்து காத்துவாக்குல ரெண்டு காதல் என்ற படத்தினை அடுத்து இயக்க உள்ளார். லைகா நிறுவனத்திற்கு அவர் கூறிய கதைக்கான பட்ஜெட் மிக அதிகமாக இருக்கிறது எனவும் அதை குறைக்க கதையில் மாற்றம் செய்யும்படி லைக நிறுவனம் கூறியதாகவும் தகவல் முன்பு பரவியது. ஆனால் அதற்குப்பிறகு அந்த படம் பற்றிய அப்டேட் எதுவும் வெளிவரவில்லை.