சின்னத்திரை நடிகர், நடிகைகள் உண்ணாவிரதம்!

சின்னத்திரை நடிகர், நடிகைகள் 14ம் தேதி உண்ணாவிரதப் போராட்டத்தில் ஈடுபடவுள்ளனர்.

தமிழ்நாடு சின்னத்திரை கலைஞர்கள் கூட்டமைப்பு சார்பில் அவசர ஆலோசனை கூட்டம் சென்னையில் நடந்தது. கூட்டத்திற்கு சங்க தலைவர் தளபதி தலைமை தாங்கினார். செயலாளர் சிவன் சீனிவாசன் முன்னிலை வகித்தார்.

கூட்டத்தில் மொழிமாற்று தொடர்களை கட்டுபடுத்துவது குறித்து ஆலோசிக்கப்பட்டது. இறுதியில், மொழிமாற்று தொடர்களால் சின்னத்திரை கலைஞர்களின் வாழ்வாதாரம் பாதிக்கப்படுவதாகவும், அத்தொடர்களின் ஆதிக்கத்தை கட்டுப்படுத்தக்கோரியும் வருகிற 14-ந் தேதி (ஞாயிற்றுக்கிழமை) சென்னை வள்ளுவர் கோட்டத்தில் ஒரு நாள் அடையாள உண்ணாவிரத போராட்டம் நடத்துவது என்றும் முடிவு செய்யப்பட்டது. காலை 9 மணி முதல் மாலை 5 மணி வரை நடக்க இருக்கும், இந்த உண்ணாவிரத போராட்டத்தில் சின்னத்திரையின் அனைத்து சங்கங்களின் உறுப்பினர்களும் பங்கேற்க உள்ளனர்.