சூரரைப் போற்று சென்சார் ரிப்போர்ட்: மொத்தம் இத்தனை கெட்ட வார்த்தைகள் மியூட் செய்யப்பட்டதா?

சூர்யா தற்போது நடித்திருக்கும் சூரரைப் போற்று படம் ரிலீசுக்கு தயாராக இருக்கிறது. இறுதி சுற்று படம் இயக்கிய சுதா கொங்கரா இயக்கியிருக்கும் இந்தப் படம் சென்சார் முடித்து யு சான்றிதழ் பெற்றிருப்பதாக கடந்த ஜூன் மாதம் அதிகாரப் பூர்வமாக அறிவிப்பு வெளிவந்தது.

மேலும் சூர்யாவின் 2டி நிறுவனம் மற்றும் குனித் மோங்கா என்ற தயாரிப்பாளருடன் இணைந்து தயாரித்திருக்கும் சூரரைப் போற்று படம் கொரோனா பிரச்சனை முடிந்து தியேட்டர்கள் மீண்டும் திறக்கப்பட்டதும் வெளியாகும் என எதிர்பார்க்கப்பட்டு வருகிறது.

இந்நிலையில் தற்போது சூரரைப் போற்று படத்தின் சென்சார் விவரங்கள் வெளிவந்திருக்கிறது. அதில் சூரரைப் போற்று படத்தில் இருக்கும் கெட்ட வார்த்தைகளின் பட்டியலும் இடம் பெற்றிருக்கிறது. அந்த வார்த்தைகளை எல்லாம் மியூட் செய்ய வேண்டும் என சென்சார் போர்டு தெரிவித்திருக்கிறது. கிட்டத்தட்ட 12 இடங்களில் இது போன்ற கெட்ட வார்த்தைகள் பயன்படுத்தப்பட்டு இருக்கின்றன. அவற்றை நீக்க அல்லது மியூட் செய்ய சென்சார் போர்டு கூறியிருக்கிறது. அதன் பிறகு தான் சூரரைப் போற்று படத்திற்கு யு சான்றிதழ் வழங்கப்பட்டு இருக்கிறது.


சூரரைப் போற்று படம் ஏர் டெக்கான் என்ற விமான சேவை நிறுவனத்தை உருவாக்கிய ஜி. ஆர். கோபிநாத்தின் வாழ்க்கை கதையை மையப்படுத்தி எடுக்கப்படுகிறது. மிக குறைந்த செலவில் ஏழை மக்களும் விமானத்தில் பயணம் செய்யலாம் என்கிற விஷயத்தை அறிமுகப்படுத்தியவர் அவர்.

இந்திய விமானப்படையில் பைலட்டாக பணியாற்றிவிட்டு அதற்குப் பிறகு விமான நிறுவனம் துவங்க வேண்டும் எனும் ஆசையில் வரும் நபராக சூர்யா நடித்திருக்கிறார். இந்த கதாபாத்திரத்திற்காக சூர்யா தன்னுடைய தோற்றத்தை பெரிய அளவில் மாற்றி நடித்திருக்கிறார். அவரது உடல் எடையையும் அவர் குறைத்து இருக்கிறார். அதன் புகைப்படங்களும் அப்போது வைரலாகி இருந்தது குறிப்பிடத்தக்கது.

'கையில் வெறும் 6000 ரூபாயை வைத்துகொண்டு ஏரோப்ளேன் கம்பெனி ஆரம்பிக்கப்போகிறேன் என சொன்னபோது.. எவண்டா இவன் லூசு என்று தான் பார்த்தது' என சூரரைப் போற்று டீசரில் ஒரு வசனம் வரும். அதுவே இந்த படத்தின் கதை எப்படி இருக்கும் என்பதை நமக்கு புரிய வைத்து இருக்கும். அந்த விமான நிறுவனத்தை தொடங்குவதற்கு அவர் பட்ட கஷ்டங்கள் மற்றும் சந்தித்த பிரச்சனைகள் பற்றி திரையில் காட்சிகள் இருக்கும் என தெரிகிறது.

மீரா மிதுனிடம் வாயை கொடுத்து, நான் வாங்கிக் கட்டிக்கவா?: லக்ஷ்மி ராமகிருஷ்ணன்

சூரரைப் போற்று படம் தற்போது பெரிய எதிர்பார்ப்பில் இருக்கும் சூழலில், தற்போது இந்த சென்சார் சான்றிதழ் வெளியாகி வைரல் ஆகி இருக்கிறது. அதனால் சூரரை போற்று படம் நேரடியாக விரைவில் ஓடிடி இணைய தளத்தில் வெளியாக உள்ளது என்கிற தகவலும் பரவி வந்தது. ஆனால் படக்குழு அந்த தகவலை முற்றிலும் பொய்யானது என மீண்டும் மறுத்து இருக்கிறார்கள். இதற்கு முன்பே சூர்யா அளித்த பேட்டியில் படம் நிச்சயம் தியேட்டரில் தான் வெளியாகும் என கூறி இருந்தார் என்பது குறிப்பிடத்தக்கது. இதற்கு முன்பு ஜோதிகா நடிப்பில் சூர்யா தயாரித்த பொன்மகள் வந்தாள் படம் நேரடியாக ஓடிடி தளத்தில் வெளிவந்தது குறிப்பிடத்தக்கது. அதற்கு தியேட்டர் உரிமையாளர்கள் கடும் எதிர்ப்பு தெரிவித்ததும் உங்களுக்கு நினைவிருக்கும்.