நவம்பர் 27ல் நடிகர் சங்கத்தின் 63வது ஆண்டு பொதுக்குழு கூட்டம்

நடிகர் சங்கத்தின் 63வது ஆண்டு பொதுக்குழு கூட்டம் நவம்பர் 27ல் கூடுகிறது.

தென்னிந்திய நடிகர் சங்கத்தின் 63வது ஆண்டுபொதுக்குழு கூட்டம் நவம்பர் 27-ம் தேதி ஞாயிற்றுக்கிழமையன்று மதியம் 2 மணியளவில் சென்னை நுங்கம்பாக்கம் லயோலா கல்லூரி வளாகத்தில் அமைந்துள்ள “பெட்ரம்“ அரங்கத்தில் நடைபெற உள்ளது.

இதுதொடர்பாக நடிகர் சங்கம் சார்பில் வெளியிடப்பட்டுள்ள அறிக்கையில் கூறியிருப்பதாவது:

தென்னிந்திய நடிகர் சங்கத்தின் 63வது ஆண்டுபொதுக்குழு கூட்டத்திற்கு, சங்க தலைவர் நாசர் தலைமை தாங்குகிறார் பொது செயலாளர் விஷால் வரவேற்புரை நிகழ்த்துகிறார், துணைத்தலைவர் கருணாஸ் 2015-16 ம் ஆண்டுக்கான ஆண்டறிக்கை மற்றும் தணிக்கை செய்யப்பட்ட வரவு செலவு கணக்குகளை பொதுக்குழு கூட்டத்தில் சமர்பித்து ஒப்புதல் பெறுகிறார்.

சங்கத்தின் எதிர்கால பொருளாதார திட்டங்கள் பற்றி பொருளாளர் கார்த்தி விளக்கமளிக்கிறார். பொதுசெயலாளர் விஷால் கடந்த கால நிர்வாக செயல்பாடுகள் மற்றும் எதிர்கால திட்டங்கள் குறித்து பொது குழுவில் ஒப்புதல் கோரவுள்ளார். மேலும், தலைவர் நாசர், தற்போதைய நாடகங்களின் நிலை குறித்தும் அவற்றின் எதிர்கால வளர்ச்சி குறித்தும் விளக்கமளிக்கிறார்.

இக்கூட்டத்தில் தென்னிந்திய நடிகர் சங்கத்தில் உறுப்பினர்களாக உள்ள முன்னணி திரை நட்சத்திரங்கள் மற்றும் மூத்த உறுப்பினர்கள் பங்கேற்க உள்ளனர்.துணைத்தலைவர் பொன்வண்ணன் நன்றி உரை ஆற்ற இப்பொதுக்குழு கூட்டம் நிறைவடைகிறது. தென்னிந்திய நடிகர் சங்க உறுப்பினர் அடையாள அட்டை மற்றும் பேரவை கூட்ட அழைப்பிதழ் கொண்டுவரும் உறுப்பினர்கள் மட்டுமே அரங்கத்திற்குள் அனுமதிக்கப்படுவார்கள்.
இவ்வாறு அறிக்கையில் கூறப்பட்டுள்ளது.