அரசு மரியாதையுடன் எஸ்.பி.பி.யின் உடல் நல்லடக்கம்

கொரோனா வைரஸ் பாதிப்பு ஏற்பட்டதால் பாடகர் எஸ்.பி. பாலசுப்பிரமணியம் கடந்த மாதம் 5ம் தேதி சென்னையில் இருக்கும் எம்.ஜி.எம். மருத்துவமனையில் அனுமதிக்கப்பட்டார். கடந்த மாதம் 13ம் தேதி அவரின் நிலைமை கவலைக்கிடமாக இருந்தது. அதன் பிறகு தேறி வந்த அவருக்கு கடந்த 4ம் தேதி பரிசோதனை செய்தபோது கோவிட்- 19 நெகட்டிவ் என்று தெரிய வந்தது. இந்நிலையில் நேற்று மதியம் 1.04 மணிக்கு அவர் மாரடைப்பால் மரணம் அடைந்தார்.

எஸ்.பி.பி.யின் உடல் சென்னையில் இருக்கும் அவரின் வீட்டிற்கு கொண்டு செல்லப்பட்டு பொதுமக்கள் அஞ்சலிக்காக வைக்கப்பட்டது. மழையையும் பொருட்படுத்தாது ரசிகர்கள் வரிசையில் நின்று எஸ்.பி.பி.க்கு இறுதி அஞ்சலி செலுத்தினார்கள். சமுத்திரக்கனி, இசையமைப்பாளர் தீனா, தயாரிப்பாளர் குஞ்சுமோன், உதயநிதி ஸ்டாலின், ப்ரியா பவானி சங்கர் உள்ளிட்டோர் எஸ்.பி.பி.யின் உடலுக்கு அஞ்சலி செலுத்தினார்கள்.

கமல் ஹாசன், ரஜினிகாந்த், இளையராஜா, சத்யராஜ் உள்ளிட்ட பிரபலங்கள் எஸ்.பி.பி.யின் மறைவால் வேதனையில் இருப்பதாக சமூக வலைதளத்தில் வீடியோ வெளியிட்டார்கள்.

உலகம் ஒரு சூனியமாப் போச்சு, பேச்சு வரல பாலு: இளையராஜா உருக்கம்

உன்னை குணமாகி வீடு திரும்பி வான்னு தானே சொன்னேன், இப்படி போயிட்டியே. நீ இல்லாமல் இந்த உலகம் சூனியமாப் போச்சு. பேச வார்த்தையே வரல என்று இசைஞானி இளையராஜா தெரிவித்தார்.

எஸ்.பி.பி.யின் உடல் நேற்று இரவு தாமரைப்பாக்கத்தில் இருக்கும் அவரின் பண்ணை வீட்டுக்கு கொண்டு செல்லப்பட்டது. அவரின் உடல் அரசு மரியாதையுடன் அங்கு நல்லடக்கம் செய்யப்பட்டது. தமிழக அரசு சார்பில் அமைச்சர் மா.பா. பாண்டியராஜன் அஞ்சலி செலுத்தினார்.

எஸ்.பி.பி. இறந்த செய்தி அறிந்ததில் இருந்தே பலரும் அவர் பாடிய பாடல்களை தான் கேட்டுக் கொண்டிருக்கிறார்கள். மேலும் எஸ்.பி. பாலசுப்பிரமணியத்தை தனிப்பட்ட முறையில் தெரிந்தவர்களோ அவரின் எளிமை, தன்னடக்கம், மனிதநேயம் பற்றி பேசிக் கொண்டிருக்கிறார்கள்.

எஸ்.பி.பாலசுப்பிரமணியம் மறையவில்லை அவரின் பாடல்கள் மூலம் என்றென்றும் வாழ்ந்து கொண்டு இருப்பார் என்று திரையுலக பிரபலங்களும், ரசிகர்களும் தெரிவித்துக் கொண்டிருக்கிறார்கள்.

எஸ்.பி. பாலசுப்பிரமணியத்தை ரசிகர்கள் மட்டும் அல்லாமல் இசையும் ரொம்ப மிஸ் பண்ணும் என்றே பலரும் கூறி வருகிறார்கள்.