Petta Second Single: பேட்ட படத்தின் 2ஆவது சிங்கிள் டிராக் நாளை வெளியீடு!

ரஜினிகாந்த் நடிப்பில் உருவாகி வரும் பேட்ட படத்தின் 2 ஆவது சிங்கிள் டிராக் உல்லால்லா நாளை மாலை 6 மணிக்கு வெளியாகயிருப்பதாக சன் பிக்சர்ஸ் நிறுவனம் அறிவிப்பு வெளியிட்டுள்ளது.

கார்த்திக் சுப்புராஜ் இயக்கத்தில் ரஜினிகாந்த் நடிப்பில் உருவாகியுள்ள படம் பேட்ட. இப்படத்தில், ரஜினியுடன் இணைந்து சிம்ரன், விஜய் சேதுபதி, த்ரிஷா, சசிகுமார், நவாசுதீன் சித்திக், பாபி சிம்ஹா, மேஹா ஆகாஷ், ராம்தாஸ், ஷனந்த் ரெட்டி, மாளவிகா மோகனன் ஆகியோர் உள்பட பலர் நடித்துள்ளனர். சன் பிக்சர்ஸ் நிறுவனம் இப்படத்தைத் தயாரித்துள்ளது. அனிருத் இப்படத்திற்கு இசையமைத்துள்ளார். கடந்த சில தினங்களுக்கு முன்பு, இப்படத்தின் தட்லாட்டம் தாங்க என்ற முதல் சிங்கிள் டிராக் வெளியாகி ரசிகர்களிடையே நல்ல வரவேற்பு பெற்றது. இப்பாடலை பிரபல பின்னணிப் பாடகர் எஸ்.பி.பாலசுப்பிரமணியம் பாடியுள்ளார்.


இதனைத் தொடர்ந்து தற்போது வரயிருப்பது தலைவர் பைலா. இப்படத்தில் இடம்பெற்றுள்ள உல்லால்லா என்று தொடங்கும் 2ஆவது சிங்கிள் டிராக் நாளை மாலை 6 மணிக்கு வெளியாகும் என்று சன் பிக்சர்ஸ் நிறுவனம் அறிவிப்பு வெளியிட்டுள்ளது. அதோடு, வரும் ஞாயிறு 9ம் தேதி மாலை 6.30 மணிக்கு இப்படத்தின் இசை வெளியீட்டு விழா மிகப்பிரமாண்டமாக நடக்கும் என்று அறிவித்துள்ளது. வரும் 12 ம் தேதி சூப்பர்ஸ்டார் ரஜினிகாந்த் தனது 68வது பிறந்தநாளை கொண்டாடுகிறார். இதன் காரணமாக, அவரது பிறந்தநாளை சிறப்பிக்கும் வகையில், பேட்ட படத்தை ஒவ்வொரு நாளும் டிரெண்டாக்கி வருகிறது என்பது குறிப்பிடத்தக்கது.

தொடர்ந்து 2 வாரங்களாக ரஜினிகாந்த் கோலிவுட் மட்டுமல்ல உலகம் முழுவதும் மாஸ் காட்டி வருகிறார். ஏனென்றால், கடந்த மாதம் 29ம் தேதி ரஜினியின் 2.0 படம் வெளியாகி தற்போது வரை ரூ.500 கோடி வசூல் சாதனை படைத்துள்ளது என்பது தான்.

இதற்கு முன்னதாக சூர்யா நடிப்பில் வந்த தானா சேர்ந்த கூட்டம் படத்தில் இடம்பெற்ற பைலா பாடல் பீலா பீலா என்று தொடங்கும் பாடலுக்கு அனிருத் இசையமைத்திருந்தார் என்பது குறிப்பிடத்தக்கது. தற்போது அதே போன்று ரஜினிக்கும் பைலா பாடல் உருவாகியுள்ளது.