வெளியானது சூர்யாவின் வாடிவாசல் ஃபர்ஸ்ட் லுக்: கேட்காமலேயே அப்டேட் கொடுத்த தாணு

நடிப்பின் நாயகன் சூர்யா இன்று தனது பிறந்தநாளை கொண்டாடுகிறார். அவருக்கு பலரும் சமூக வலைதளங்களில் வாழ்த்து தெரிவித்து வருகிறார்கள். இந்நிலையில் வெற்றிமாறன் இயக்கத்தில் சூர்யா நடிக்கவிருக்கும் வாடிவாசல் படத்தின் ஃபர்ஸ்ட் லுக் போஸ்டரை வெளியிட்டு ரசிகர்களுக்கு இன்ப அதிர்ச்சி கொடுத்துள்ளனர்.

கலைப்புலி எஸ். தாணு தயாரிக்கும் வாடிவாசல் படத்திற்கு ஜி.வி. பிரகாஷ் இசையமைக்கிறார். வாடிவாசல் போஸ்டரை வெளியிட்டு தாணு ட்விட்டரில் கூறியிருப்பதாவது,

தம்பி..
இன்று உங்கள் பிறந்தநாள்...
என்றும் அது சிறந்த நாள்..
இனிய இந்நன்னாளில்
எல்லா வளமும்
நலமும் பெற்று
தேக பலம்
பாத பலம்
ஆயுள் பலம் பெற்று
வாழிய பல்லாண்டு என்று வாழ்த்தியுள்ளார்.
வாடிவாசல் போஸ்டரை பார்த்த சூர்யா ரசிகர்கள் கூறியிருப்பதாவது,

வெறித்தனமாக இருக்கிறது. தரமான சம்பவம் இருக்கு. இதை சத்தியமாக எதிர்பார்க்கவே இல்லை. போஸ்டர் வெளியிட்டதற்கு நன்றி. அப்டேட் என்றால் இப்படி இருக்க வேண்டும். தாணு சாருக்கு நன்றி. வாடிவாசலுக்காக மரண வெயிட்டிங் என்று தெரிவித்துள்ளார்கள்.

சூர்யாவின் பிறந்தநாளை முன்னிட்டு சுதா கொங்கரா இயக்கத்தில் அவர் நடித்துள்ள சூரரைப் போற்று படத்தில் வரும் காட்டுப் பயலே பாடலின் ஒரு நிமிட வீடியோ இன்று காலை 10 மணிக்கு வெளியானது. காட்டுப் பயலே வீடியோ வெளியாகும் என்பது அனைவருக்கும் தெரியும். ஆனால் வாடிவாசல் போஸ்டர் இப்படி வெளியாகும் என்று சூர்யா ரசிகர்கள் எதிர்பார்க்கவில்லை.

'காட்டுப் பய' சூர்யா பிறந்தநாளுக்கு சூப்பர் கிஃப்ட் கொடுத்த சூரரைப் போற்று படக்குழு

சூரரைப் போற்று அப்டேட் கேட்டு சூர்யா ரசிகர்கள் மாதக் கணக்கில் சுதா கொங்கராவிடம் கெஞ்சிக் கொண்டிருந்தார்கள். இந்நிலையில் தாணு கேட்காமலேயே அப்டேட் கொடுத்து அசத்தியது அவர்களை கவர்ந்துள்ளது.

வெற்றிமாறன் இயக்கும் வாடிவாசல் படம் தமிழர்களின் பாரம்பரிய விளையாட்டான ஜல்லிக்கட்டை மைமயமாக வைத்து எடுக்கப்பட உள்ளது. பலரும் வாடிவாசல் பற்றி ட்வீட் செய்து கொண்டிருப்பதால் #Vaadivasal என்கிற ஹேஷ்டேக் ட்விட்டரில் தேசிய அளவில் டிரெண்டாகிக் கொண்டிருக்கிறது.

சூர்யாவின் பிறந்தநாளான இன்று #KaattuPayale #Vaadivasal #NadippinNayagan, #HappyBirthdaySuriya #Sooraraipottru ஆகிய ஹேஷ்டேகுகள் காலையில் இருந்து டிரெண்டாகி வருகிறது என்பது குறிப்பிடத்தக்கது.

நேருக்கு நேர் முதல் சூரரைப் போற்று வரை: நடிப்பின் நாயகன் சூர்யா கடந்து வந்த பாதை