நிறைவு பெற்றது சூர்யா நடிக்கும் ‘எஸ் 3’

ஹரி இயக்கத்தில் சூர்யா, அனுஷ்கா, ஸ்ருதிஹாசன் மற்றும் பலர் நடிக்கும் ‘எஸ் 3’ படத்தின் படப்பிடிப்பு முடிவடைந்துவிட்டது. இந்த வருடத் துவக்கத்தில் ஆரம்பமான இப்படத்தின் படப்பிடிப்பு சுமார் பத்து மாத காலங்களில் நிறைவடைந்துள்ளது. சென்னை, விசாகப்பட்டிணம், ஐதராபாத், ஜார்ஜியா உள்ளிட்ட இடங்களில் இப்படத்தின் படப்பிடிப்பு நடைபெற்றுள்ளது.

இப்படத்தை ஒரே சமயத்தில் தெலுங்கிலும் வெளியிட உள்ளார்கள்.சூர்யாவிற்கு இதற்கு முன் வெளிவந்த சில படங்கள் வியாபார ரீதியாக பெரிய வெற்றியைத் தராததால் அவர் ‘எஸ் 3’ படத்தைத்தான் பெரிதும் நம்பிக் கொண்டிருக்கிறார். அதற்கேற்றபடி இப்படத்தின் வியாபாரமும் படப்பிடிப்பு நடைபெற்றுக் கொண்டிருக்கும் போதே நடந்து முடிந்தது.

முதல் இரண்டு பாகங்களிலும் நடித்த அனுஷ்கா, மூன்றாவது பாகத்திலும் இருக்கிறார். கூடவே மற்றொரு நாயகியாக ஸ்ருதிஹாசன் நடித்துள்ளார். ஹாரிஸ் ஜெயராஜ் இசையமைத்துள்ள இப்படத்தின் டீசர் தீபாவளி அன்று வெளியாகும் என்று எதிர்பார்க்கப்படுகிறது. டிசம்பர் 16ம் தேதி படத்தை வெளியிடுகிறார்கள்.