நடிகர் சங்கத்திலிருந்து விலக வேண்டாம்: சிம்புவுக்கு டி.ஆர் வேண்டுகோள்

சென்னை: நடிகர் சங்கத்தில் இருந்து விலகுவதாக சிம்பு எடுத்த முடிவை சிம்பு மறுபரிசீலனை செய்ய வேண்டும் என இயக்குனரும், சிம்புவின் தந்தையுமான டி.ராஜேந்தர் வேண்டுகோள் விடுத்துள்ளார்.

இது தொடர்பாக டி.ஆர் வெளியிட்டுள்ள அறிக்கையில், 'நடிகர் சங்கத்தில் இருந்து சிம்பு விலகக் கூடாது' என தெரிவித்துள்ளார். சிம்பு விவகாரத்தைப் போல் மற்ற உறுப்பினர்களின் விவகாரத்திலும் விஷால் இப்படி நடந்துக் கொள்ளக் கூடாது எனவும் கூறியுள்ளார்.

கடந்த சில நாட்களுக்கு முன்னதாக, நடிகர்களின் பிரச்னைகளை தீர்த்து வைக்கும் அமைப்பான தென்னிந்திய நடிகர் சங்கம் தனது விவகாரத்தில் உதவவில்லை என்றும், தனது புதுப்பட பணிகள் பாதிக்கப்படுவதால், சங்கத்தில் இருந்து விலகுவதாக சிம்பு அறிவித்திருந்தார்.

சிம்புவின் இந்த முடிவை மறுபரிசீலனை செய்யுமாறு நடிகர் ராதிகா சரத்குமாரும் தனது டுவிட்டர் பக்கத்தில் கருத்து தெரிவித்திருந்தார். இதற்கிடையே நடிகர் சங்க தலைவர் நாசர், சிம்புவை நடிகர் சங்கத்திலிருந்து விலக விடமாட்டோம் என சிறப்புப் பேட்டி கொடுத்திருந்தது குறிப்பிடத்தக்கது.