ஈஷா யோக மைய மஹா சிவராத்திரி வழிபாட்டில் சத்குருவுடன் தமன்னா சிறப்பு வழிபாடு!!

நடிகை தமன்னா மஹா சிவராத்திரியை முன்னிட்டு வெள்ளிங்கிரி மலையில் உள்ள ஈஷா யோக மையத்தில் சத்குருவுடன் இணைந்து சிறப்பு வழிபாடுகளில் கலந்து கொண்டார்.

தமிழகம் முழுவதும் நேற்று முதல் மஹா சிவராத்திரி சிறப்பு வழிபாடுகள் மிகவும் சிறப்பாக நடந்து வருகிறது. நேற்று இரவு நான்கு கால அபிஷேக ஆராதனை சிவனுக்கு நடந்தது. மஹா சிவராத்திரியை முன்னிட்டு கோவை அருகே வெள்ளிங்கிரி மலை அடிவாரத்தில் உள்ள ஈஷா யோக மையத்தில் சிறப்பு வழிபாடுகள், நடன நிகழ்ச்சிகள் நடந்தன. இதில், ஆயிரக்கணக்கான பக்தர்கள் கலந்து கொண்டனர்.

சிறப்பு வழிபாடுகளில் நடிகை தமன்னாவும் கலந்து கொண்டார். இதுகுறித்து தனது இன்ஸ்டாகிராமில் பதிவு செய்துள்ளார். அவரது பதிவில், ''சத்குரு அவர்களுடன் நானும் ஈஷா யோக மையத்தில் நடந்த சிறப்பு மஹா சிவராத்திரி வழிபாடுகளில் கலந்து கொண்டேன். இது எனக்கு ஒரு மேஜிக்கல் அனுபவம் போல் இருந்தது. அங்கிருந்த ஒவ்வொரு நிமிடத்தையும் நான் ரசித்து, அனுபவித்தேன். அங்கு பணியாற்றியவர்களை நான் குறிப்பிட்டே ஆக வேண்டும். எந்த வித சுயநலமும் இல்லாமல், சிறப்பான ஏற்பாடுகளை செய்து இருந்தனர். நினைத்து கூட பார்க்க முடியவில்லை. சத்குருவுக்கு எத்தனை நன்றிகள் கூறினாலும் போதாது, நினைவில் நிற்கும் சிவராத்திரியாக எனக்கு அமைந்துவிட்டது'' என்று தெரிவித்துள்ளார்.