நகுலுக்கு ஜோடி பாலிவுட் நடிகை

நகுல் நடிக்கும் ‘செய்’ படத்தில் அவருக்கு ஜோடியாக பாலிவுட் நடிகை ஆஞ்சல் நடிக்கவுள்ளார்.

நகுல் நடிக்கும் புதிய படம் ‘செய்’. பெரிய நடிகராக வேண்டும் என்று முயற்சிக்கும் நகுல் அதற்காக படாதபாடுபடுகிறார். சினிமாவில் நினைத்ததை சாதிக்க முடிந்ததோ இல்லையோ நிஜவாழ்வில் பெரிய சாதனை செய்கிறார். அது எப்படி திருப்பமாக அமைகிறது என்பதை மையமாக வைத்து ஸ்கிரிப்ட் உருவாகி உள்ளது. ஹீரோயினாக பாலிவுட் நடிகை ஆஞ்சல் நடிக்கிறார். இவர் நகுலை எப்படி ஆட்டுவிக்கிறார் என்பதை உணர்த்தும் வகையில் படத்தின் பர்ஸ்ட் லுக் போஸ்டர் வெளியிடப்பட்டது.

பொம்மலாட்டம் பாணியில் ஆஞ்சல் கையில் கயிறு இருக்க அதில் சிக்கிய கைப்பாவைபோல் நகுல் தோன்றும் காட்சி இடம்பெற்றுள்ளது.சென்னை, புதுச்சேரியில் படப்பிடிப்பு நடந்துள்ளது. ராஜேஷ் கே.ராமன் கதை, திரைக்கதை வசனம் எழுத ராஜ்பாபு இயக்குகிறார். விஜய் உலகநாதன் ஒளிப்பதிவு. நிகஸ் லோபஸ் இசை. மன்னு தயாரிக்கிறார்.