அரசியல் மட்டுமல்லாமல் சினிமாவிலும் புரட்சி செய்தவர்: கலைஞரின் புகழ் பாடும் சினிமா பிரபலங்கள்!

மறைந்த திமுக தலைவர் கலைஞர் கருணாநிதியின் 98வது பிறந்தநாள் விழா இன்று கொண்டாடப்பட்டு வருகிறது. அரசியலில் மட்டுமல்லாமல் சினிமாவிற்காகவும் பல தொண்டுகள் ஆற்றியுள்ளார் கலைஞர். சமூக வலைத்தளங்களில் பலரும் கலைஞர் கருணாநிதியின் பிறந்த நாளுக்கு வாழ்த்து தெரிவித்து வருகின்றனர். அந்த வகையில் சினிமா துறையை சேர்ந்தவர்களும் இணையத்தில் கலைஞர் கருணாநிதியின் சாதனைகளை பகிர்ந்து வாழ்த்து தெரிவித்து வருகின்றனர்.

திராவிட இயக்கத்தின் மூத்த தலைவரும், முன்னாள் தமிழக முதல்வருமான கலைஞர் மு.க.கருணாநிதியின் 98-வது பிறந்த தினம் இன்று. அரசியல்வாதியாக மட்டுமல்லாமல் பத்திரிக்கையாளர், கவிஞர், எழுத்தாளர், திரைக்கதையாசிரியர், வசனகர்த்தா, பட்டிமன்ற நடுவர், பாடலாசிரியர் என பல தளங்களிலும் தனக்கென தனியான, அழியாத அடையாளத்தை உருவாக்கியவர் கலைஞர் கருணாநிதி. சினிமாவில் அவர் எழுதிய பகுத்தறிவு வசனங்கள் சமூகத்தில் பரவி கிடந்த மூடநம்பிக்கைகளை பகடி செய்து, மக்களிடையே விழிப்புணர்வை ஏற்படுத்தியது.

இந்நிலையில் மறைந்த கலைஞர் கருணாநிதியின் 98 வது பிறந்தநாளை முன்னிட்டு, அவரின் சாதனைகள் குறித்து பலரும் இணையத்தில் பகிர்ந்து வருகின்றனர். அந்த வரிசையில் இயக்குனர் சீனுராமசாமி தனது ட்விட்டர் பக்கத்தில், 'நாத்திகம் பேசும் படத்திற்கு 'பராசக்தி' எனப் பெயரிட்டவர் முத்தமிழ் அறிஞர் கலைஞர் அவர்கள்... படங்களுக்கு தலைப்பு சூட்டுவதில் எனக்கு அவரே ஆசான். அன்பு பிறந்த நாள்.. வாழ்த்துகள் அய்யா' என பதிவிட்டுள்ளார்.

ஓரம் கட்டும் தமிழ் சினிமா: தெலுங்கு திரையுலகிற்கு செல்லும் முன்னணி இயக்குனர்கள்!
அதனை தொடர்ந்து மூடர்கூடம் இயக்குனர் நவீன் தனது ட்விட்டர் பக்கத்தில், 'என் தந்தையின் 29ஆம் நினைவுநாள் இன்று. எங்க ஊருல எங்கப்பாவ எல்லாருமே MGRநுதான் கூப்டுவாங்களாம். ஆனா MGRஆ கலைஞரானு வந்தப்ப, ரசனை வேற கொள்கை வேறனு கலைஞர் பக்கம் நின்னவர். அப்பா சாகும்வரை ஒரு #DravidianStock-ஆ இருந்ததுக்கு காரணம் கலைஞரின் சமூகநீதிக்கான தில்லு" என பதிவிட்டுள்ளார்.


அதேபோல் நடிகரும், மக்கள் நீதி மையம் கட்சியின் தலைவருமான கமல்ஹாசன் தனது ட்விட்டர் பக்கத்தில், அறிஞர் அண்ணாவின் கொள்கையான மாநிலத் தனித்துவத்தை வடக்குவரை எதிரொலித்த ஆளுமை; தானின்றி தமிழ்நாட்டின் அரசியல் அசைவுகள் இல்லையென இறுதிவரை இருத்திக்காட்டியவர் கலைஞர் கருணாநிதி. அவர்தம் பிறந்த நாளின் அவரது உறுதிகொண்ட நெஞ்சை நினைவுகூர்வோம் என பதிவிட்டுள்ளார். இதே போல் மேலும், பல சினிமா பிரபலங்களும், அரசியல் கட்சி தலைவர்களும், பொது மக்களும் கலைஞர் கருணாநிதியின் பிறந்தநாளை கொண்டாடி வருகின்றனர்.