தீபாவளியை கலகலப்பாக்க வரும் காமெடி நடிகர்கள்!

தீபாவளி பண்டிகை சினிமா ரசிகர்களை இரட்டிப்பு சந்தோஷமாக்குகிறது. தங்களுக்கு பிடித்தமான ஸ்டார்களின் படங்கள் வெளியாகும் என்பதால் பெரும் ஆவலுடன் காத்திருப்பார்கள். அதற்கு அடுத்தப்படியாக படங்களை கலகலப்பாக்கும் காமெடி நடிகர்களின் பங்கு முக்கியமானது. அந்த வகையில் இந்த வருட தீபாவளிக்கு நம்மை சிரிக்க வைக்க காமெடி நடிகர்கள் போட்டா போட்டியில் வர இருக்கின்றனர். நீண்ட இடைவெளிக்கு பிறகு வடிவேலு நடிப்பதால் அவருடைய கத்தி சண்டை படத்திற்கு பெரும் எதிர்பார்ப்பு நிலவுகிறது. இந்நிலையில் கார்த்தியின் காஷ்மோரா வருவதால் விஷாலின் கத்திசண்டை ரிலீஸை தள்ளிவைத்துள்ளனர்.

காஷ்மோராவில் நடிகர் விவேக் நடிக்கிறார். கார்த்தியின் அப்பாவாக விவேக் நடித்தாலும் காமெடிக்கு பஞ்சம் இருக்காது என்று படக்குழுவினர் கூறுகின்றனர். அதே போல் தனுஷ் நடிப்பில் வெளியாகும் கொடி படத்தில் காளி வெங்கட் சிங்கமுத்து உள்ளனர். ராஜேஷ் இயக்கத்தில் ஜி.வி.பிரகாஷ் நடிக்கும் கடவுள் இருக்கான் குமாரு முழுக்க முழுக்க காமெடி படமாக தான் உருவாகியிருக்கும். இந்தப்படத்தில் RJ பாலாஜி, தம்பி ராமையா, மொட்டை ராஜேந்திரன் ஆகியோர் நடிக்கின்றனர். மனோ பாலா, ரோபோ சங்கர், சிங்கம் புலி, எம்.எஸ்.பாஸ்கர் என காமெடி பட்டாளமே உள்ளது. அதனால் காமெடி நடிகர்கள் தீபாவளியை கலகலப்பாக மாற்ற வரிசை கட்டி வர இருக்கின்றனர்.