மகனுக்காக மீண்டும் தயாரிப்பு களத்தில் இறங்கிய தம்பி ராமய்யா!

தமிழ் சினிமாவில் பிரபல இயக்குனராகவும், குணசித்திர நடிகராகவும் இருப்பவர் தம்பி ராமய்யா. இவரது மகன் உமாபதி ‘அதாகப்பட்டது மகா ஜனங்களே’ என்ற படத்தின் மூலம் ஹீரோவாக அறிமுகமானார். அந்தப்படம் எதிர்பார்த்த வரவேற்பை பெறவில்லை. இதனால் தானே தயாரிப்பாளராகவும், இயக்குனராகவும் மாறி ‘மணியார் குடும்பம்’ என்ற படத்தை தயாரித்தார் தம்பி ராமய்யா. இந்தப் படமும் உமாபதிக்கு கைகொடுக்கவில்லை.

அதன்பிறகு சேரன் இயக்கத்தில் ‘திருமணம்’ என்ற படத்தில் உமாபதி நடித்தார். இந்தப் படமும் உமாபதியை தூக்கிவிடவில்லை. இதனால் தம்பி ராமய்யா, மகனுக்காக மீண்டும் தயாரிப்பாளராகி இருக்கிறார்.அவர் தனது நண்பர் சாகுல் ஹமீதுடன் இணைந்து ‘தேவதாஸ்’ என்ற படத்தை தயாரித்து வருகிறார். இந்தப் படத்தில் உமாபதிக்கு ஜோடியாக நடிகைகள் மனிஷா யாதவ், அய்ரா ஆகிய இருவரும் ஹீரோயினாக நடிக்கிறார்கள். மேலும் படத்தில் யோகிபாபு படம் முழுக்க வருகிற கேரக்டரில் நடிக்கிறார்.