மிரட்டும் கொரோனா... தேதி குறிப்பிடப்படாமல் மீண்டும் ஒத்திவைக்கப்பட்ட இயக்குநர் சங்கத் தேர்தல்!

தமிழகத்தில் கொரோனா பரவல் நாளுக்கு நாள் அதிகரித்து வருகிறது. இதன் காரணமாக கூட்டத்தை தவிர்க்கும் வகையில் தமிழக அரசு பல்வேறு கட்டுப்பாடுகளை விதித்து வருகிறது. இதோபோல் ஞாயிற்றுக் கிழமைகளிலும் தமிழகத்தில் முழு பொதுமுடக்கம் அமல் படுத்தப்பட்டு வருகிறது.

இந்நிலையில் கொரோனா பரவல் காரணமாக தமிழ்நாடு திரைப்பட இயக்குநர்கள் சங்க தேர்தல் ஒத்திவைக்கப்பட்டுள்ளது. தமிழ்நாடு திரைப்பட இயக்குனர்கள் சங்க தேர்தல் 23 ஆம் தேதியான நேற்று நடைபெறும் என ஏற்கனவே அறிவிக்கப்பட்டிருந்தது.


இந்த தேர்தலில் கே.பாக்யராஜ் தலைமையில் ஒரு அணியினரும், ஆர்.கே.செல்வமணி தலைமையில் ஒரு அணியினரும் போட்டியிடுகின்றனர். இந்நிலையில் ஞாயிற்றுக்கிழமைதோறும் தமிழக அரசு ஊரடங்கை அமல்படுத்துவதால், தேர்தல் இரண்டு நாள் தள்ளி வைக்கப்படுவதாக அறிவிக்கப்பட்டது.

அதன்படி வரும் 25ம் தேதி தேர்தல் நடைபெறும் என்று கூறப்பட்டது. ஆனால், இயக்குநர்கள் சங்கத்தின் தேர்தல் நடைபெற்றால் பெரும் கூட்டம் கூடும் என்பதால் சென்னை மாநகராட்சியின் நோய்த் தடுப்புத் துறை தேர்தல் நடத்த அனுமதி மறுத்துவிட்டது. இதையடுத்து இயக்குனர்கள் சங்க தேர்தல் தேதி அறிவிக்கப்படாமல் ஒத்திவைக்கப்பட்டுள்ளது.


தேர்தல் நடந்து புதிய நிர்வாகிகள் தேர்வு செய்யப்படும்வரையிலும் போட்டியின்றி தேர்வு செய்யப்பட்ட சங்கத்தின் துணைத் தலைவர்களான இயக்குநர்கள் மாதேஷும், எழிலும் சங்கத்தின் நிர்வாகத்தைக் கவனித்துக் கொள்வார்கள் என அறிவிக்கப்பட்டுள்ளது. இதேபோல் இதேபோல் சின்னத்திரை நடிகர்கள் சங்கத்திற்கும் வரும் 27-ம் தேதியன்று தேர்தல் நடைபெறுவதாக இருந்தது. கொரோனா பரவல் காரணமாக அந்த தேர்தலும் ஒத்திவைக்கப்பட்டுள்ளது.