கருணாகரனுக்கு கண்ணீர் அஞ்சலி போஸ்டர் ஒட்டிய தளபதி ரசிகர்கள்!!

நடிகர் விஜய்யையும் அவரது ரசிகர்களையும், சமூக வலைத்தளங்களில் விமர்சனம் செய்து வரும் கருணாகரனுக்கு, விஜய் ரசிகர்கள் கண்ணீர் அஞ்சலி போஸ்டர் உருவாக்கியுள்ளது பரபரப்பை ஏற்படுத்தியுள்ளது.

நடிகர் விஜய் நடிப்பில் உருவாகி வரும் ‘சர்கார்’ படத்தின் இசை வெளியீட்டு விழா கடந்த சில தினங்களுக்கு முன் நடைபெற்றது. மிகவும் பிரம்மாண்டமாக நடந்த இந்த இசைவெளியீட்டு விழாவில், நடிகர் விஜய் அரசியல் பற்றி தெரிவித்தக் கருத்துகள் அரசியல் வட்டாரங்களில் விவாதப் பொருளாக மாறியுள்ளது.

இது ஒருபுறம் இருக்க, காமெடி நடிகரான கருணாகரன், தனது ட்விட்டர் பக்கத்தில் நான் விஜய்யை வெறுப்பதாகவும், அவர் கூறும் அறிவுரைகள் அரசியல்வாதிகளுக்கு மட்டும்தானா, நடிகர்களுக்கு இல்லையா, உங்கள் ரசிகர்களிடம் பேச வேண்டாம் என கூறுங்கள், அவர்கள் கேட்கிறார்களா என்று பார்ப்போம் என பதிவிட்டார்.

அவரின் இந்தக் கருத்து விஜய் ரசிகர்கள் மத்தியில் மிகுந்த கோபத்தை ஏற்படுத்தியது. இதையடுத்து, விஜய் ரசிகர்களுக்கும் கருணாகரனுக்கும் இடையே சமூக வலைத்தளத்தில் வார்த்தைப் போர் மூண்டது.

இதில், கருணாகரன் தமிழரே இல்லை என்றும், அவர் ஆந்திராவைச் சேர்ந்தவர் என்றும் விஜய் ரசிகர்கள் கூற, அதற்கு கருணாகரன், நான் தமிழ்நாட்டில் தான் பிறந்தேனா என முட்டாள் தனமான கேள்விகளைக் கேட்க வேண்டாம், சர்கார் என்பது தமிழ் தலைப்பா? என பதிவிட்டார்.

இதனால் கடும் கோபத்தில் உள்ள விஜய் ரசிகர்கள், சமூக வலைத்தளங்களில் அவரை சகட்டு மேனிக்கு திட்டி தீர்த்துள்ளனர். இதில் ஒரு சில ரசிகர்கள் அடுத்தக் கட்டத்திற்குச் சென்று, கருணாகரனுக்கு கண்ணீர் அஞ்சலி போஸ்டர் உருவாக்கியுள்ளது அனைவரையும் அதிர்ச்சிக்கு உள்ளாக்கியுள்ளது.