குருவுக்கு நன்றி செலுத்தும் விதத்தில் எஸ்.ஏ.சி. படத்தில் நடிக்கும் விஜய்!

தனது குருநாதருக்கு நன்றி செலுத்தும் வகையில் எஸ்.ஏ.சந்திரசேகர் நடிக்கும் படத்தில் சிறப்பு தோற்றத்தில் விஜய் ஆண்டனி நடிக்கவுள்ளார்.

நடிகர் விஜய்யின் தந்தை எஸ்.ஏ.சந்திரசேகர், பிரபல சமூக சேவையாளர் டிராபிக் ராமசாமியின் வாழ்க்கை வரலாறு படத்தில் நடித்து வருகிறார். படத்தில் நடிகை ரோகினி எஸ்.ஏ.சியின் மனைவியாக நடிக்கிறார். ஆர்.கே.சுரேஷ் வில்லனாக நடிக்கிறார். இந்தப் படத்தை விஜய் விக்ரம் இயக்கி வருகிறார்.

இந்த நிலையில் இந்த படத்தில் பிரபல நடிகரும் இசையமைப்பாளருமான விஜய் ஆண்டனி சிறப்பு தோற்றத்தில் நடிக்கவுள்ளார். இந்த படத்தில் விஜய் ஆண்டனி, அதே பெயரில் ஒரு நடிகராகவே நடிக்கிறார். அவரது கேரக்டர் இந்த படத்தின் திருப்புமுனையை ஏற்படுத்தும் என இயக்குனர் விஜய்விக்ரம் கூறியுள்ளார்.

நடிகர் விஜய் ஆண்டனியை சினிமாவில் அறிமுகம் செய்தவர் எஸ்.ஏ.சந்திரசேகர்தான். இவர் இயக்கிய ‘சுக்ரன்’ படத்தில்தான் விஜய் ஆண்டனி இசையமைப்பாளராக அறிமுகமானார். தன்னை சினிமாவில் அறிமுகப்படுத்திய குருவுக்கு செலுத்தும் நன்றிக்காக விஜய் ஆண்டனி இந்த படத்தில் நடிக்க சம்மதித்துள்ளதாக கூறப்படுகிறது.