ரஜினி, அஜித், சிம்பு, ஆர்.ஜே.பாலாஜி மோதும் பொங்கல் 2019; ரசிகர்கள் கொண்டாட்டம்!

பண்டிகை நாட்களில் பெரிய நடிகர்களின் படங்கள் திரைக்கு வருவது வழக்கம். ஆனால் ஏராளமான நடிகர்களின் படங்கள் வரும் போது, திரையரங்குகள் கிடைப்பதில் சிக்கல் ஏற்படுகின்றன.

அந்த வகையில் வரும் பொங்கல் 2019ல் ரஜினி நடிப்பில் பேட்ட, அஜித் நடிப்பில் விஸ்வாசம், சிம்பு நடிப்பில் வந்தா ராஜாவா தான் வருவேன், ஆர்.ஜே.பாலாஜியின் எல்.கே.ஜி ஆகிய படங்கள் வெளிவர இருப்பதாக அறிவிக்கப்பட்டுள்ளன.

இருப்பினும் 3 படங்கள் பெரிய நடிகரின் படங்கள் என்பதால், திரையரங்குகள் கிடைப்பதில் நிச்சயம் சிக்கல் எழும். இதற்கு தயாரிப்பாளர் சங்கம் தான் உரிய தீர்வளிக்க வேண்டும்.

அந்த வகையில் பொங்கல் நெருங்கும் வேளையில், படங்களின் வெளியீட்டு தேதி குறித்து அதிகாரப்பூர்வ அறிவிப்பு மீண்டும் வெளியாகும் என்பதில் சந்தேகமில்லை. ரஜினி நடிப்பில் 2.0 படம் இம்மாத இறுதியில் வெளியாகிறது.

எனவே அடுத்த 45 நாட்களுக்குள் மற்றொரு ரஜினி படம் வெளியிட வேண்டுமா என்று யோசித்து வருகின்றனர். இதனால் இருபடங்களும் வசூலில் பாதிப்பு ஏற்படும் என்று கருதுகின்றனர். ஆகையால் பேட்ட படம் நிச்சயம் தள்ளிப் போகக்கூடும் என்று எதிர்பார்க்கப்படுகிறது.