மாஸ்டர் படக்குழுவின் அதிரடி முடிவு: தியேட்டர் உரிமையாளர்கள் ஹேப்பி

லோகேஷ் கனகராஜ் இயக்கத்தில் விஜய், விஜய் சேதுபதி, மாளவிகா மோகனன் உள்ளிட்டோர் நடித்துள்ள மாஸ்டர் படம் தியேட்டர்களில் அல்ல மாறாக ஓடிடியில் வெளியாகிறது என்று பேச்சு கிளம்பியது. இதை பார்த்த விஜய் ரசிகர்கள் மாஸ்டரை தியேட்டரில் தான் ரிலீஸ் செய்ய வேண்டும் என்றார்கள்.

மாஸ்டர் நெட்ஃப்ளிக்ஸில் ரிலீஸாகிறதா?: உண்மையை சொன்ன படக்குழு

இந்நிலையில் மாஸ்டர் படத்தின் தயாரிப்பாளர் வெளியிட்ட அறிக்கையில் கூறியிருந்ததாவது,

மாஸ்டர் படத்தை தியேட்டர்களில் கொண்டாட வேண்டும் என்கிற உங்களின் ஆவல் எங்களுக்கு புரிகிறது. உங்களை போன்றே அந்த நாளுக்காக நாங்களும் காத்திருக்கிறோம். கடந்த சில நாட்களாக வதந்திகள் பரவிய நிலையில் அது குறித்து விளக்கம் அளிக்க விரும்புகிறோம்.

ஒரு பிரபல ஓடிடி தளத்திடம் இருந்து ஆஃபர் வந்துள்ள போதிலும் நாங்கள் தியேட்டரில் ரிலீஸ் செய்யவே விரும்புகிறோம். தற்போதுள்ள சூழலில் அது தான் திரைத்துறைக்கு தேவை. எங்களுக்கு ஆதரவு அளிக்குமாறு தியேட்டர் உரிமையாளர்களை கேட்டுக் கொள்கிறோம் என்று அதில் தெரிவிக்கப்பட்டது.

மாஸ்டர் படக்குழு வெளியிட்ட அறிக்கையை பார்த்த தியேட்டர் உரிமையாளர்கள் மகிழ்ச்சி அடைந்துள்ளதுடன், அவர்களின் நிலைப்பாட்டை வரவேற்றுள்ளனர். கொரோனா வைரஸ் பிரச்சனையால் கடந்த மார்ச் மாதம் மூடப்பட்ட தியேட்டர்கள் கடந்த 10ம் தேதி தான் திறக்கப்பட்டன.

அதுவும் 50 சதவீத இருக்கைகள் மட்டுமே பயன்படுத்தப்பட வேண்டும் என்பது அரசு விதிமுறை. இந்நிலையில் மாஸ்டர் போன்ற பெரிய படம் ரிலீஸானால் தியேட்டர்களுக்கு அது உதவியாக இருக்கும். தியேட்டர்களை திறந்த உடனேயே மாஸ்டர் படத்தை வெளியிட்டு கூட்டத்தை ஈர்க்கும் திட்டத்தில் தியேட்டர் உரிமையாளர்கள் இருந்ததாக முன்பு தகவல் வெளியானது என்பது குறிப்பிடத்தக்கது.

மாஸ்டர் படம் ஓடிடியில் அல்ல தியேட்டர்களில் தான் ரிலீஸ் செய்யப்படும் என்கிற வாக்குறுதி விஜய் ரசிகர்களை நிம்மதி அடைய வைத்துள்ளது.