விரைவில் துப்பறிவாளன் 2 வெளிவரும்: விஷால்!

விஷால் நடிப்பில் வெளியான துப்பறிவாளன் படத்தைத் தொடர்ந்து அதன் 2ம் பாகமும் உருவாகும் என்று விஷால் தெரிவித்துள்ளார்.

மிஷ்கின் இயக்கத்தில் விஷால் நடிப்பில் கடந்த வியாழன்று திரைக்கு வந்த படம் துப்பறிவாளன். வித்தியாசமான நடிப்பை வெளிப்படுத்திய விஷாலின் இப்படம் ரசிகர்களிடையே நல்ல வரவேற்பு பெற்று வருகிறது. மேலும், வழக்கமாக காதல், காமெடி என்று கலக்காமல் துடிப்பான துப்பறியும் அதிகாரியாக நடித்து ரசிகர்களின் பாராட்டைப் பெற்றுள்ளார். இந்த நிலையில், இப்படத்தின் சக்சஸ் மீட் சென்னையில் நடந்தது. அப்போது பேசிய விஷால், கூறுகையில், இயக்குனர் மிஷ்கினுடன் பணியாற்றியதில் பெருமை அடைகிறேன்.



அவரது இயக்கத்தில் தொடர்ந்து பல படங்களில் நடிக்க விரும்புகிறேன். இப்படத்தைத் தொடர்ந்து துப்பறிவாளன் படத்தின் 2ம் பாகமும் மிஷ்கின் இயக்கத்தில் உருவாகும் என்று கூறியுள்ளார். ரஜினிகாந்த், கமல்ஹாசன், தனுஷ், சூர்யா ஆகியோர் உள்பட பலர் 2ம் பாக படங்களில் நடித்து வரும் நிலையில், விஷாலும் அந்தப் பட்டியலில் இணைந்துவிட்டார். தற்போது விஷால் சண்டக்கோழி 2 படத்தில் நடிக்க ஒப்பந்தமாகியிருக்கிறார் என்பது குறிப்பிடத்தக்கது.