உலகநாயகன் தொகுத்து வழங்கும் பிக்பாஸ் நிகழ்ச்சியின் சீசன் 2 டீசர்!!

பொதுமக்கள் மத்தியில் மிகப்பெரிய வரவேற்பைப் பெற்ற, ‘பிக்பாஸ்’ நிகழ்ச்சியினுடைய இரண்டாவது சீசனின் டீசர் இன்று மாலை விஜய் டிவியில் வெளியாகிறது.

தனியார் தொலைக்காட்சி நிறுவனமான ஸ்டார் விஜய்யில் கடந்த ஆண்டு, ‘பிக்பாஸ்’ என்ற புதிய ரியாலிட்டி ஷோ ஒன்றைத் தொடங்கியது. இதில், ஒரு மிகப்பெரிய வீட்டில் 15 போட்டியாளர்கள் அடைக்கப்படுவார்கள். அதிலிருந்து, மக்கள் அளிக்கும் வாக்குகளின் அடிப்படையில், குறைவான வாக்குகளைப் பெற்றவர் ஒவ்வொரு வாரமும் வெளியேற்றப்படுவார். இறுதியாக 100 நாட்கள் கழித்து, அதிக வாக்குகள் பெற்றவர் வெற்றியாளராக அறிவிக்கப்படுவார்.

பல்வேறு சர்ச்சைகளுக்கு உள்ளான இந்த நிகழ்ச்சியை, நடிகர் கமல்ஹாசன் தொகுத்து வழங்கினார். அவர் நிகழ்ச்சியைத் தொகுத்து வழங்கும்போது, தமிழக அரசை சீண்டும் வகையில் பல்வேறு கருத்துகளை கூறினார். இதனால், கமலுக்கும் அதிமுக அமைச்சர்களுக்கும் இடையே கருத்து மோதல் உண்டானது.

இதன் வெளிப்பாடாக, கமல் அரசியலுக்கு வந்து, மக்கள் நீதி மய்யம் என்ற புதிய கட்சியையும் தொடங்கினார். இவ்வாறாக, தமிழக அரசியலில் ஒரு மிகப்பெரிய மாற்றம் உண்டானதற்கு, ஆரம்ப புள்ளியாக திகழ்ந்த இந்த நிகழ்ச்சியின் இரண்டாவது சீசன் விரைவில் தொடங்க உள்ளது.

மேலும், கமல் அரசியலுக்கு வந்துவிட்டதால், இந்த சீசனில் தொகுத்து வழங்கமாட்டார் என எதிர்பார்க்கப்பட்ட நிலையில், மீண்டும் கமலே இந்நிகழ்ச்சியைத் தொகுத்து உள்ளதாக தெரிவிக்கப்பட்டுள்ளது. இதனால், நிகழ்ச்சி மிகவும் சுவாரஸ்யமாக இருக்கும் எனவும் எதிர்பார்க்கபடுகிறது.

இந்நிலையில், இந்த சீசனுக்கான டீசர் இன்று மாலை 5 மணியளவில் விஜய் டிவியில் வெளியாக உள்ளது. இதனால், ரசிகர்கள் மிகுந்த உற்சாகத்தில் உள்ளனர். மேலும், இந்த சீசனில் போட்டியாளர்களாக யாரெல்லாம் பங்கேற்பார்கள் என்ற கேள்வியும் எழுந்துள்ளது.