என்னாது, வடிவேலு பாஜகவில் சேர்ந்து பிரச்சாரம் செய்யப் போகிறாரா?

தமிழ் திரையுலகின் பிசியான நகைச்சுவை நடிகராக வலம் வந்த வடிவேலுவின் நிலைமை தற்போது எப்படி இருக்கிறது என்பது அனைவருக்கும் தெரியும். வடிவேலு நடிக்காமல் இருப்பதால் ரசிகர்கள் கவலையில் இருக்கிறார்கள். இந்நிலையில் தான் விரைவில் நடிக்கப் போவதாக வடிவேலு தெரிவித்தார்.

வடிவேலு படங்களில் நடிக்காவிட்டாலும் மீம்ஸுகள் மூலம் தினம் தினம் ரசிகர்களை சந்தித்துக் கொண்டு தான் இருக்கிறார். அவர் நடித்த காட்சிகளை யாரும் மறக்கவில்லை. அதற்கு காரணம் மீம்ஸ் கிரியேட்டர்கள். அரசியல், ஐபிஎல், சினிமா என்று எதுவாக இருந்தாலும் சரி வடிவேலுவின் புகைப்படங்கள், வீடியோக்களை வைத்து தான் மீம்ஸ் போடுகிறார்கள்.

புதுப்படங்களின் ஃபர்ஸ்ட் லுக் போஸ்டரோ, டீஸரோ, ட்ரெய்லரோ வெளியானால் அதன் வடிவேலு வெர்ஷனை மீம்ஸ் கிரியேட்டர்கள் கண்டிப்பாக வெளியிடுவார்கள். பல நேரங்களில் ஒரிஜினலை விட வடிவேலு வெர்ஷன் தான் மாஸாக இருக்கும்.

இப்படி மீம்ஸுகள் மூலம் நம்மை எல்லாம் சிரிக்க வைத்துக் கொண்டிருக்கும் வடிவேலு விரைவில் பாஜகவில் சேரப் போவதாக தகவல் வெளியாகி தீயாக பரவியுள்ளது. தமிழக சட்டசபை தேர்தலில் வடிவேலை பிரச்சாரம் செய்ய வைக்க பாஜக முடிவு செய்துள்ளதாக கூறப்படுகிறது. இருப்பினும் இந்த தகவலை வடிவேலு இதுவரை உறுதி செய்யவில்லை.

Vijay குஷ்புவை அடுத்து விஜய் அப்பா எஸ்.ஏ. சி. பாஜகவில் சேர்கிறாரா?

விஜய்யின் அப்பா எஸ்.ஏ. சந்திரசேகர் பாஜகவில் சேர்கிறார் என்று கடந்த சில நாட்களுக்கு முன்பு தகவல் வெளியானது. அவரிடம் கேட்டதற்கு, நான் பாஜகவில் சேரவில்லை. யார் இந்த வதந்தியை பரப்பிவிட்டது என்று தெரியவில்லை என்றார்.

முன்னதாக விஷால் பாஜகவில் சேர்கிறார் என்று தகவல் வெளியானது. அதை பார்த்த அவர் பதறிப் போய், இல்லை, இல்லை, அந்த தகவலில் உண்மை இல்லை என்றார். தமிழ் திரையுலகை சேர்ந்த பிரபலங்கள் பாஜகவில் இணையப் போவதாக வதந்தி பரவி வருவது வழக்கமாகிவிட்டது.

காங்கிரஸ் கட்சியின் செய்தித் தொடர்பாளராக இருந்த குஷ்பு அண்மையில் தான் பாஜகவில் சேர்ந்தார். பக்தாஸை ஓட, ஓட விரட்டிய குஷ்பு போய் இப்படி பாஜகவில் சேர்ந்துவிட்டாரே, இது நியாயமா என்று பலரும் சமூக வலைதளங்களில் தெரிவித்தனர்.

உங்களை நக்கத் கான், நீங்கள் ஒரு முஸ்லீம் என்று கூறி வம்பிழுத்தவர்களின் கட்சியில் போய் சேர்ந்துவிட்டீர்களே அக்கா என்று சமூக வலைதளவாசிகள் புலம்பினார்கள். இந்நிலையில் வடிவேலு பாஜகவில் சேர்வதாக தகவல் வெளியாகியிருக்கிறது. இது கண்டிப்பாக வதந்தியாகத் தான் இருக்கும். வடிவேலு எல்லாம் பாஜகவில் சேர வாய்ப்பே இல்லை என்கிறார்கள் ரசிகர்கள்.