பேட்மேன் தாக்கம்: சத்யம் திரையரங்கில் பெண்களுக்கு இலவச நாப்கின்!!

பேட்மேன் படத்தைத் தொடர்ந்து சத்யம் திரையரங்குகளில் பெண்களுக்கு இலவச நாப்கின்கள் வழங்கப்பட்டு வருகிறது. இதற்கென வென்டிங் இயந்திரங்களை அமைத்துள்ளது.

கோவையைச் சேர்ந்தவர் அருணாச்சலம் முருகானந்தம். இவர் பெண்களுக்கு நாப்கின்கள் தயாரித்து குறைந்த விலையில் வழங்கி அதன் முக்கியத்துவத்தையும், அவசியத்தையும் விளக்கி வந்தார்.

இந்த நிலையில் இதையே கரு பொருளாக வைத்து பாலிவுட் நடிகர் அக்ஷய் குமார் நடிப்பில் பேட்மேன் படம் வெளியானது. இந்தப்படம் வெளியான முதல் நாளான நேற்று மட்டும் ரூ. 10 கோடி வசூல் செய்துள்ளது.

இந்த நிலையில், சத்யம் திரையரங்கம் தனது திரையரங்கிற்கு வரும் பெண்களுக்கு என்று இலவச நாப்கின்கள் வழங்கும் சேவையை நேற்று முதல் துவக்கியுள்ளது. தற்போது சத்யம் திரையரங்குகளில் மட்டும் இந்த சேவை துவங்கப்பட்டுள்ளது. பெங்களூர், சென்னை, கோவை, மும்பை, நெல்லூர், புதுச்சேரி, திருவனந்தபுரம், வாரங்கல் ஆகிய இடங்களில் சத்யம் தியேட்டர்கள் உள்ளன. எஸ்கேப், பலாசோ, லி ரெவே சினிமாஸ், எஸ் 2 ஆகியவற்றிலும் வழங்கப்பட்டும் என்று சத்யம் திரையரங்கம் தனது பேஸ்புக் மற்றும் டுவிட்டரில் தெரிவித்துள்ளது.

இதற்கென, சத்யம் திரையரங்கின் கழிப்பறைகளில் வென்டிங் இயந்திரங்கள் வைக்கப்பட்டுள்ளது. அதில் வரும் எண்ணுக்கு நமது செல்போனில் இருந்து மிஸ்டு கால் கொடுத்தால், அதில் நாப்கின் வரும்.

நடிகர் அக்ஷய் குமாரின் மனைவி டிவிங்கிள் கன்னா இந்தப் படத்தை தயாரிக்க, ஆர். பால்கி இயக்க, ராதிகா ஆப்தே, சனம் கபூர் நடித்துள்ளனர். ஒளிப்பதிவாளராக பி.சி ஸ்ரீராம் பணியாற்றியுள்ளார்.

இந்தப் படம் குறித்து அருணாச்சலம் தனது டுவிட்டர் பக்கத்தில் தெரிவித்துள்ள கருத்தில், ‘’என்னுடைய வாழ்க்கையை வைத்து ஒரு படம் தயாரிக்கப்படுமா என்பதை நான் நினைத்து கூட பார்த்தது இல்லை. 20 ஆண்டுகளுக்குப் பின்னர் திரைப்படமாக எனது வாழ்க்கை வந்து இருப்பதற்கு நன்றிக் கடன் செலுத்துகிறேன். அக்ஷய் குமார் மற்றும் அவரது மனைவி டிவிங்கிள் கன்னாவுக்கும் நன்றி தெரிவிக்கிறேன். எனது மனைவி இல்லாமல் இது சாத்தியம் ஆகி இருக்காது. அவருக்கும் எனது நன்றியை தெரிவித்துக் கொள்கிறேன்’’ என்று பதிவிட்டுள்ளார்.