சென்னை 600 028: வெங்கட் பிரபுவின் 2 ஆவது இன்னிங்க்ஸ்

சென்னை: இயக்குனர் வெங்கட் பிரபு சென்னை 600 028 படத்தின் 2 ஆவது பாகம் இயக்குவதை உறுதி செய்தார்.

நடிகரான வெங்கட் பிரபு, கடந்த 2007 ஆம் ஆண்டு வெளியான சென்னை 600 028 படம் மூலம் இயக்குனராக அறிமுகமானார். உள்ளூர் கிரிக்கெட் போட்டியை வைத்து பெரும்பாலும் புதுமுகங்கள் நடித்த அந்தப் படம் வெங்கட் பிரபுவுக்கு முன்னணி இயக்குனர் அந்தஸ்தையும் வழங்கியது.

இதையடுத்து, அஜித், சூர்யா, கார்த்தி என பெரிய ஹீரோக்களை இயக்கிய அவர், சென்னை 600 028 படத்தின் இரண்டாவது பாகம் எடுக்க உள்ளதாக தற்போது அறிவித்துள்ளார். சென்னை 600 028 படைத்தின் முதல் பாகத்தில் நடித்த ஜெய், சிவா, பிரேம் ஜி, விஜய் வசந்த், நிதின் சத்யா, இனிகோ பிரபாகர் என அதே குழுவுடன் களமிறங்க வெங்கட் பிரபு திட்டமிட்டுள்ளதாகத் தகவல்கள் வெளியாகின.

யுவன் சங்கர்ராஜா இசையமைக்கும் இந்த படத்தின் முதல் லுக் போஸ்டர் மற்றும் டீசர் ஆகியவற்றை வெங்கட் பிரபு சமூக வலைதளங்களில் வெளியிட்டுள்ளார். மேலும், இந்த படத்தை தனது சொந்த தயாரிப்பு நிறுவனமான பிளாக்டிக்கெட் கம்பெனி மூலம் வெங்கட்பிரபு தயாரிக்கவும் திட்டமிட்டுள்ளார்.