பார்ட்டி’ படத்துக்கு பூஜையைப் போட்ட வெங்கட்பிரபு குழு!

இயக்குனர் வெங்கட் பிரபு ‘பார்ட்டி’ படத்திற்கு பூஜையை போட்டுள்ளார்.

தொடர்ந்து தோல்வி படங்களை கொடுத்து வந்த இயக்குனர் வெங்கட்பிரபுவுக்கு, நீண்ட இடைவெளிக்குப்பின் ‘சென்னை 28’ 2ம் பாகம் ஓரளவு வெற்றியைக் கொடுத்தது. தற்போது அவர் ‘பார்ட்டி’ என்ற பெயரில் ஒரு படத்தை இயக்கவுள்ளார். படத்தை அம்மா கிரியேஷன்ஸ் சார்பில் டி.சிவா தயாரிக்கிறார்.

படத்தில் சத்யராஜ், ரம்யாகிருஷ்ணன், ஜெயராம், நாசர், சம்பத், ஜெய், ‘மிர்ச்சி’ சிவா, கயல் சந்திரன், ரெஜினா கெசண்டரா, சஞ்சிதா ஷெட்டி, நிவேதா பெதுராஜ் உட்பட பல நட்சத்திரப் பட்டாளமே நடிக்கிறது.

இந்த படத்தின் பூஜை எளிமையான முறையில் நடைபெற்றது. ‘பொதுவாக படத்துக்கு பூஜை போட்டா பார்ட்டி வைப்பாங்க, ஆனால் முதல் தடவையாக ‘பார்ட்டி’ படத்துக்கு பூஜை போட்டிருக்கோம்‘ என்று தனது வழக்கமான ஸ்டைலில் காமெடியாக டுவீட் செய்துள்ளார் வெங்கட் பிரபு.

எப்போதுமே வெங்கட் பிரபு இயக்கும் படங்களுக்கு யுவன் ஷங்கர் ராஜாதான் இசையமைப்பார். தற்போது ‘பார்ட்டி’ படத்துக்கும் வெங்கட்பிரபு தயாரிக்கும் ‘ஆர்.கே.நகர்’ படத்துக்கு அவர் இசையமைக்கவில்லை. இந்த இரு படங்களுக்கும் வெங்கட்பிரபுவின் தம்பி பிரேம்ஜிதான் இசையமைத்து வருகிறார் என்பது குறிப்பிடத்தக்கது.