பழம்பெரும் நடிகரும், எழுத்தாளருமான டாம் ஆல்டர் காலமானார்!

மும்பை: பழம்பெரும் நடிகரும், எழுத்தாளருமான டாம் ஆல்டர் இன்று காலமானார்.

கடந்த 1950ஆம் ஆண்டு உத்தரப்பிரதேச மாநிலம் முசூரியில் பிறந்தவர் டாம் ஆல்டர்(67). அமெரிக்க பாரம்பரியத்தைக் கொண்ட டாம், புனே திரைப்படக் கல்லூரியில் பயின்றவர். 300க்கும் மேற்பட்ட திரைப்படங்களிலும், டிவி சீரியல்களிலும் நடித்துள்ளார்.

கிரிக்கெட் ஆர்வலரான இவர், விளையாட்டு விமர்சகராக இருந்துள்ளார். மேலும் மூன்று புத்தகங்களையும் எழுதியுள்ளார். கிரிக்கெட் ஜாம்பவான் சச்சின் டெண்டுல்கரை முதல் முதலில் டிவியில் பேட்டி கண்டவர் என்ற பெருமையை பெற்றவர்.

இவரது கலைத் தொண்டினை பாராட்டி, 2008ஆம் ஆண்டு, பத்ம ஸ்ரீ விருது வழங்கி மத்திய அரசு கௌரவித்தது. இவருடைய மனைவி கரோல், மகன் ஜேமி ஆல்டர், மகள் அஃப்ஷான்.

இவர் கடந்த சில மாதங்களாக தோல் புற்றுநோயால் பாதிக்கப்பட்டு, மருத்துவமனையில் சிகிச்சை பெற்று வந்தார். இந்நிலையில் சிகிச்சை பலனின்றி இன்று காலை உயிரிழந்ததாக, அவரது குடும்பத்தார் தெரிவித்தனர்.

Veteran actor Tom Alter passes away at his Mumbai residence. He was suffering from skin cancer.