அட்றா அட்றா அட்றா.. சாந்தனுவை இப்படி பாராட்டினாரா விஜய்?

கொரோனா லாக்டவுன் இந்திய சினிமா துறையை முழுமையாக முடக்கிவிட்டது. அதனால் இரவு பகல் என நேரம் பார்க்காமல் பிஸியாக நடித்து கொண்டிருந்த டாப் நடிகர்கள் கூட வீட்டில் இருக்க வேண்டிய சூழ்நிலை ஏற்பட்டது. இரண்டு மாதங்களுக்கும் மேலாக லாக் டவுன் நீடித்து வரும் நிலையில் மீண்டும் ஷூட்டிங் எப்போது துவங்கும் என தகவல் இல்லை. அரசின் அனுமதிக்காக சினிமா துறையினர் காத்திருக்கின்றனர்.

பிரபலங்கள் இந்த நேரத்தில் தங்களுக்கு பிடித்த பல விஷயங்களை செய்து தங்கள் நேரத்தை செலவழித்து வருகின்றனர். இந்நிலையில் நடிகர் சந்தானு நேரத்தை வீணாகாமல் வீட்டில் தனது மனைவி உடன் இணைந்து ஒரு குறும்படத்தை இயக்கி வெளியிட்டார். அதற்கு நல்ல வரவேற்பும் கிடைத்தது.

இதன் டீஸர் வெளிவந்த போது அதனை நடிகர் விஜய்க்கு அனுப்பிவைத்தாராம் சாந்தனு. அந்த டீசரில் "செஞ்ச தப்புக்கு மன்னிப்பு கேக்குறான் பாரு அவன் மனுஷன். செய்யாத தப்புக்கு மன்னிப்பு கேக்குறான் பாரு அவன் தான் புருஷன்" என சாந்தனு ஒரு வசனம் பேசி இருப்பார்.

அதை பார்த்துவிட்டு விஜய் என்ன பதில் கூறினார் தெரியுமா?

'அட்றா அட்றா அட்றா Factu Factu Factu' என்று தான் ரெஸ்பான்ஸ் செய்தாராம் விஜய். இந்த ரெஸ்பான்ஸ் ஷாந்தனுவுக்கு மகிழ்ச்சியை ஏற்படுத்தியுள்ளது. முழு குறும்படத்தையும் பார்த்துவிட்டு விஜய் சாந்தனுவை பாராட்டினாராம்.

சாந்தனு விஜய்யின் தீவிர ரசிகர் என்பது அனைவருக்கும் தெரியும். அதை அவரே வெளிப்படையாகவே கூறியும் உள்ளார். சாந்தனு - கீர்த்தி திருமணத்தை தாலி எடுத்து கொடுத்து நடத்தி வைத்ததே தளபதி விஜய் தான். அந்த அளவுக்கு அவரது ரசிகராக இருக்கும் ஷாந்தனு தனது குறும்படத்திற்கு விஜய் பாராட்டு கிடைத்ததும் சும்மாவா இருந்திருப்பார். துள்ளி குதித்திருப்பார்.

சாந்தனு தற்போது விஜய்யின் மாஸ்டர் படத்தில் ஒரு முக்கிய ரோலில் நடித்து உள்ளார். லோகேஷ் கனகராஜ் இயக்கியுள்ள இந்த படத்தில் விஜய் கல்லூரி ஆசிரியராக நடித்துள்ளார். சாந்தனு கல்லூரி மாணவராக நடித்திருக்கலாம் என கூறப்படுகிறது. இதுவரை தனது ரோல் பற்றி சாந்தனு எந்த தகவலையும் வெளியிடவே இல்லை என்பது குறிப்பிடத்தக்கது. அந்த அளவுக்கு ரகசியம் காத்து வருகிறார். படத்தில் முக்கிய ட்விஸ்ட் வர தனது ரோல் காரணமாக இருக்கும் என்று அவர் ஒரு பேட்டியில் கூறி இருந்தது குறிப்பிடத்தக்கது.

மாஸ்டர் படத்தின் ஷூட்டிங்கில் பங்கேற்றபோது விஜய் கொடுத்த அட்வைஸ் பற்றி சாந்தனு முன்பு ஒரு பேட்டியில் பேசி இருந்தார். பிரச்சனைகளை தாண்டி எப்போதும் செல்ல பழகிக்கொள்ள வேண்டும், அது வாழ்க்கையில் ஒரு பகுதி தான் என விஜய் அட்வைஸ் கொடுத்ததாக தெரிவித்தார் அவர்.

சாந்தனு தான் இயக்கிய குறும்படத்திற்கு கிடைத்த ரெஸ்பான்ஸுக்கு ரசிகர்களுக்கு நன்றி கூறும் விதமாக ஒரு அறிக்கையை வெளியிட்டு இருந்தார். அதில்.. "பாக்யராஜ் புள்ள நடிக்கிறேங்கிறதவிட கதை எழுதி டைரக்ட் பண்ணி ஒரு குறும்படமா வெளியிட்றது தான் பெருமையான விஷயமா மனசுக்கு பட்டது. அது அப்பாவையும் அம்மாவையும் ரொம்ப ரொம்ப சந்தோச படுத்துமுன்னு தோணுச்சு. அது உங்க பேராதரவுனாலயும் மரியாதைக்குரிய தமிழ் மக்கள் பேராதரவுனாலயும் ஒரு பெரிய மரியாதையை வாங்கிக் குடுத்திருச்சு," என உருக்கமாக நன்றி கூறி இருந்தார்.