First Look Poster:இரட்டை வேடத்தில் சும்மா மாஸ் காட்டிய தளபதி: வெளியானது பிகில் ஃபர்ஸ்ட் லுக் போஸ்டர்!

தெறி மற்றும் மெர்சல் ஆகிய வெற்றிப் படங்களை கொடுத்த அட்லி – விஜய் கூட்டணியில் உருவாகும் 3ஆவது புதிய படம் தளபதி63. இன்னும் டைட்டில் வைக்கப்படாத இப்படத்தின் தலைப்பு தற்போது அறிவிக்கப்பட்டுள்ளது. அதன்படி, தளபதி63 படத்திற்கு பிகில் என்று டைட்டில் வைக்கப்பட்டுள்ளது. கில்லி, அழகிய தமிழ் மகன் ஆகிய படங்களைத் தொடர்ந்து விஜய் இப்படத்தில் விளையாட்டு கதையில் நடித்து வருகிறார்.

அதுவும், கால்பந்து விளையாட்டை மையப்படுத்திய இப்படத்தில் விஜய், அப்பா மற்றும் மகன் என்று இரு கதாபாத்திரங்களில் நடித்து வருவதாக கூறப்படுகிறது. மேலும், கால்பந்து பயிற்சியாளராக விஜய் நடித்துள்ளார் என்று தகவல் வந்த வண்ணம் உள்ளது. இதில், மகன் விஜய்யின் கதாபாத்திரத்தின் பெயர் பிகில் என்று கோலிவுட் வட்டாரத்தில் தெரிவிக்கப்பட்டுள்ளது. அதே போன்று, வில்லு படத்தைத் தொடர்ந்து விஜய்க்கு ஜோடியான நயன்தாராவின் கதாபாத்திரத்தின் பெயர் ஏஞ்சல் என்றும் கூறப்படுகிறது. ஆனால், இது குறித்து எந்த முறையான அறிவிப்பும் வெளியாகவில்லை.

மீன் மார்க்கெட்டில் அப்பா, மகன்: வைரலாகும் பிகில் ஃபர்ஸ்ட் லுக் போஸ்டர்!


இந்த நிலையில் ஜூன் 22ம் தேதியான நாளை விஜய் தனது 46ஆவது பிறந்தநாளை கொண்டாடுகிறார். இதனை தாறுமாறாக சிறப்பிக்கும் வகையில், தளபதி63 படத்தின் டைட்டில் மற்றும் ஃபர்ஸ்ட் லுக் போஸ்டர் வெளியாகியுள்ளது. தொடர்ந்து 22ம் தேதி நள்ளிரவு 12 மணிக்கு இரண்டாவது லுக் போஸ்டரும் வெளியாக உள்ளது.

விஜய் பிறந்தநாளை முன்னிட்டு நாடு முழுவதும் இல்ல, உலகம் முழுவதும் உள்ள விஜய் ரசிகர்கள், பல்வேறு நலத்திட்ட உதவிகளை செய்ய திட்டமிட்டுள்ளனர் என்பது குறிப்பிடத்தக்கது. ஏ.ஆர்.ரஹ்மான் இசையமைக்கும் இப்படத்தை ஏஜிஎஸ் நிறுவனம் தயாரித்து வருகிறது. இந்நிறுவனம் விஜய் படத்தை தயாரிப்பது இதுவே முதல் முறை என்பது குறிப்பிடத்தக்கது. இப்படத்தில் விஜய்யுடன் இணைந்து விவேக், கதிர், யோகி பாபு, ஜாக்கி ஷரூப், டேனியல் பாலாஜி, ஆனந்தராஜ், இந்துஜா, ரெபா மோனிகா ஜான், வர்ஷா போலம்மா, தேவர்ஷினி, சௌந்தரராஜா, ஞானசம்பந்தம், ராஜ்குமார், பின்னணி பாடகர் பூவையார் ஆகியோர் பலர் நடித்துள்ளனர் என்பது குறிப்பிடத்தக்கது.

இதற்கு முன்னதாக, விஜய் நடிப்பில் வந்த படங்களின் ஃபர்ஸ்ட் லுக் போஸ்டர்கள் செய்த சாதனையை இப்படம் முறியடிக்கும் என்று எதிர்பார்க்கப்படுகிறது. அரசியல் கதையை மையப்படுத்திய சர்கார் படத்தின் ஃபர்ஸ்ட் லுக் போஸ்டரில் புகைப்பிடிப்பது போன்று புகைப்படம் இடம் பெற்றிருந்தது பெரும் சர்ச்சையை ஏற்படுத்தியது. இதற்கு எழுந்த சர்ச்சையைத் தொடர்ந்து அந்த ஃபர்ஸ்ட் லுக் போஸ்டர் உடனடியாக நீக்கப்பட்டது என்பது குறிப்பிடத்தக்கது.