ரெட் ஜெயண்ட்
பிரபல நடிகராகவும் எம்எல்ஏவாகவும் இருப்பவர் உதயநிதி ஸ்டாலின். இவர் ரெட் ஜெயன்ட் மூவிஸ் என்ற சினிமா தயாரிப்பு மற்றும் விநியோக நிறுவனத்தை நடத்தி வருகிறார். ரெட் ஜெயன்ட் நிறுவனம் ஆரம்பத்தில் பட தயாரிப்பில் கவனம் செலுத்திய நிலையில் தற்போது விநியோகத்தில் ஆர்வம் காட்டி வருகிறது.
அதிகளவு ரிலீஸ்
அதிலும் திமுக ஆட்சிக்கு வந்த பிறகு ரெட் ஜெயண்ட் நிறுவனம் வழக்கத்தை காட்டிலும் அதிகளவு படங்களை ரிலீஸ் செய்வதாக கூறப்படுகிறது. இந்த ஆண்டு இதுவரை ரெட்ஜெயண்ட் நிறுவனம் வெளியிட்ட பெரும்பாலான படங்கள் பாக்ஸ் ஆபிஸில் பட்டையை கிளப்பியுள்ளன.
ரெட் ஜெயண்டின் வெற்றி
இந்நிலையில் ரெட் ஜெயண்ட்டின வெற்றிக்கு பின்னால் இருப்பவர்கள் என்று ஒரு பதிவை ட்விட்டரில் அந்த நிறுவனம் வெளியிட்டுள்ளது. அதில் ரெட் ஜெயண்ட் மூவிஸில் பணியாற்றும் பணியாளர்கள் இடம்பெற்றுள்ளனர். மேலும் இவர்கள்தான் எஃப்.ஐ.ஆர்., காத்துவாக்குல ரெண்டு காதல், டான், நெஞ்சுக்கு நீதி மற்றும் விக்ரம் படங்களின் வெற்றிக்கு பின்னால் இருந்து உழைத்தவர்கள் என்று குறிப்பிடப்பட்டிருந்தது. ஆனால் இதில் விஜய் நடித்த பீஸ்ட் படம் இடம் பெறவில்லை.
ரசிகர்கள் ஏமாற்றம்
இதனால் விஜய் ரசிகர்கள் அப்செட் ஆகியுள்ளனர். சன் பிக்சர்ஸ் தயாரித்த பீஸ்ட் படத்தை ரெட் ஜெயண்ட் மூவிஸ் நிறுவனம்தான் திரையரங்குகளில் ரிலீஸ் செய்தது. பீஸ்ட் படம் விமர்சன ரீதியாக வரவேற்பை பெறவில்லை என்றாலும், பாக்ஸ் ஆபிஸில் வசூல் குவித்ததாக கூறப்பட்டது. ஆனால் ரெட் ஜெயண்ட் நிறுவனம் பீஸ்ட் படத்தை குறிப்பிடாதது விஜய் ரசிகர்களுக்கு பெரும் ஏமாற்றத்தை கொடுத்துள்ளது.