புற்றுநோயுடன் போராடும் நடிகர் தவசிக்கு ரூ. 1 லட்சம் கொடுத்த விஜய் சேதுபதி

கருப்பன் குசும்புக்காரன் என்கிற வசனம் மூலம் பட்டிதொட்டி எல்லாம் பிரபலமானவர் தவசி. சிவகார்த்திகேயனின் வருத்தப்படாத வாலிபர் சங்கம் படத்தில் நடித்த அவர் தற்போது புற்றுநோயுடன் போராடிக் கொண்டிருக்கிறார்.

நோய் தாக்கிய பிறகு அவர் எலும்பும், தோலுமாக ஆகிவிட்டார். சிகிச்சைக்கு பணம் இல்லை என்று கூறி உதவி கேட்டிருந்தார். தவசியின் லேட்டஸ்ட் புகைப்படத்தை பார்த்த சினிமா ரசிகர்கள் அதிர்ச்சி அடைந்தார்கள். இந்நிலையில் தவசிக்கு சிவகார்த்திகேயன் ரூ. 25 ஆயிரமும், சூரி ரூ. 20 ஆயிரமும் கொடுத்து உதவியுள்ளனர்.
தவசிக்கு விஜய் சேதுபதி ரூ. 1 லட்சம் அளித்துள்ளார். நடிகர் சவந்தரராஜா தவசியை மருத்துவமனையில் சந்தித்து பேசியதுடன், விஜய் சேதுபதி கொடுத்த பணத்தை அவரிடம் வழங்கினார். மேலும் சவுந்தர ராஜாவும் ரூ. 10 ஆயிரம் கொடுத்தார்.

புற்றுநோயால் அவதிப்படும் நடிகர் தவசியின் மருத்துவ செலவை ஏற்ற திமுக எம்.எல்.ஏ. சரவணன்

எலும்பும், தோலுமாக தவசி உதவி கேட்ட புகைப்படத்தை பார்த்த திருப்பரங்குன்றம் தொகுதி திமுக எம்.எல்.ஏ.வும், டாக்டருமான சரவணன் அவரின் மருத்துவ செலவு மொத்தத்தையும் ஏற்றுக் கொண்டுள்ளார். தன் மருத்துவனையிலேயே தவசியை அனுமதித்து சிகிச்சை வழங்கி வருகிறார்.

சரவணன் செய்த உதவியை பார்த்த சமுத்திரக்கனி, யோகி பாபு, கஸ்தூரி உள்ளிட்டோர் அவரை பாராட்டியுள்ளனர். ட்விட்டரில் யோகி பாபு கூறியதாவது,

திருப்பரங்குன்றம் திமுக MLA டாக்டர்.சரவணன் தன்னுடைய சரவணா மருத்துவமனையில் அனுமதித்து தானே சிகிச்சை அளித்துக் கொண்டு இருக்கிறார். அவர் கூறியதாவது தவசியை கூடுமானவரை நாங்கள் பார்த்துக் கொள்கிறோம் அவரது குடும்பத்திற்கு உதவ முன்வாருங்கள் என்றார் என தெரிவித்துள்ளார்.

தவசி குறித்து அறிந்த திமுக எம்.பி. டாக்டர் செந்தில் குமார் அவரின் தொடர்பு எண்ணை கேட்டு ட்வீட் செய்தார். அதை பார்த்த சரவணன், அவருக்கு நன்றி தெரிவித்ததுடன், தவசிக்கு சிகிச்சை அளிப்பது குறித்தும் கூறினார்.