96 Movie: இன்று வெளிவந்துள்ள ’96’ படத்தின் அதிகாலை காட்சிகள் ரத்து- காரணம் இதுதான்..!!

விஜய் சேதுபதி, த்ரிஷா நடிப்பில் இன்று வெளியாகியுள்ள ’96’ படத்தின் அதிகாலை காட்சிகள் திடீரென ரத்து செய்யப்பட்டன. இதனால் படத்தை பார்க்க காத்திருந்த ரசிகர்கள் ஏமாற்றம் அடைந்தனர்.

தமிழ் சினிமா ரசிகர்களால் மிகுந்த எதிர்பார்க்கப்பட்டு வந்த திரைப்படம் ’96’. சி. பிரேம்குமார் இயக்கத்தியில் விஜய் சேதுபதி, த்ரிஷா முதன்முறையாக இணைந்து நடித்துள்ள இப்படம் பள்ளிப்பருவ காதலை மையமாக வைத்து உருவாக்கப்பட்டுள்ளது.

முன்னணி நடிகர்களின் படங்கள் வெளிவரும் நாளில், அதிகாலையில் சிறப்பு காட்சி திரையிடப்படுவது வழக்கம். இது குறிப்பிட்ட நடிகர்களின் ரசிகர்களுக்காக திரையிடப்பட்டு வருகிறது.

தற்போது தமிழ்சினிமாவில் விஜய் சேதுபதியும் முன்னணி நடிகர் என்பதால், இன்று வெளிவந்துள்ள ‘96’ படத்திற்கான சிறப்பு காட்சியை திரையிட தயாரிப்பு நிறுவனம் ஆயத்தமாகி இருந்தது.

ஆனால் எதிர்பாராத சில காரணங்களால் இந்த படத்திற்கான சிறப்பு காட்சிகள் ரத்து செய்யப்பட்டன. இதனால் படத்தை பார்க்க அதிகாலை முதல் திரையரங்க வாசலில் திரண்டிருந்த ரசிகர்கள் பெருத்த ஏமாற்றம் அடைந்தனர்.

’96’ படத்தின் சிறப்பு காட்சி ரத்து செய்யப்பட்டதற்கான காரணத்தை தயாரிப்பு நிறுவனம் இதுவரை தெரிவிக்கவில்லை. எனினும், திரையிரங்கில் படத்தை திரையிடும்போது பயன்படுத்தப்படும் ’கேடிஎம் கீ கோடு’ பெறுவதில் தாமதம் ஏற்பட்டதாக தகவல்கள் தெரிவிக்கின்றன.

சி. பிரேம்குமார் இயக்கத்தில் தயாராகியுள்ள ‘96’ திரைப்படத்தின் பாடல்கள் ஏற்கனவே வெளியாகி ரசிகர்களிடம் வரவேற்பு பெற்றுள்ளன. இந்த படத்தில் முக்கிய கதாபாத்திரங்களில் ஜனகராஜ், வர்ஷா பொலம்மா, தேவதர்ஷினி, ஆடுகளம் முருகதாஸ், கவிதாலயா கிருஷ்ணன், பகவதி பெருமாள், காளி வெங்கட் உள்ளிட்ட பலரும் நடித்துள்ளனர்.