விக்ரம் பிரபுவின் 'வீர சிவாஜி' ரிலீஸ் தள்ளிவைப்பு

சென்னை: நடிகர் விக்ரம் பிரபு நடிப்பில் உருவாகியுள்ள 'வீர சிவாஜி' படத்தின் வெளியீட்டை படக்குழுவினர் தள்ளிவைத்துள்ளனர்.

சமீபத்தில் இப்படத்தின் சுவாரஸ்யமான டிரைலர், இசை வெளியாகி ரசிகர்கள் மத்தியில் பிரபலமடைந்த நிலையில், படத்தின் மீதான எதிர்ப்பார்ப்பை அதிகரிக்கும் வகையில் 'வீர் சிவாஜி' வெளியீட்டு தேதியை தள்ளிவைத்துள்ளதாக தகவல்கள் பரவி வருகின்றன.

இப்படம் முன்னதாக செப்.23ஆம் தேதி இப்படம் வெளியாகும் என தெரிவிக்கப்பட்டது. தற்போது ஆயுத பூஜை வெளியீடு, தீபாவளி வெளியீடு என நிறைய படங்கள் வரிசையில் இருப்பதால் 'வீர சிவாஜி' பட இயக்குனர் கணேஷ் விநாயக் இப்படத்தின் வெளியீட்டை நவம்பர் மாதத்திற்கு தள்ளி வைத்துள்ளார்.

எனினும், இது குறித்த அதிகாரப்பூர்வ தகவல் இதுவரை வெளியாகவில்லை. விக்ரம் பிரபு நடிப்பில் இந்த ஆண்டு வெளியாகும் இரண்டாவது படம் வீர சிவாஜியாகும். முன்னதாக் வெளியான 'வாகா' திரைப்படம் பாக்ஸ் ஆபீசில் சரியாக போகவில்லை.

ஆக்ஷன் காமெடி படமாக உருவாகியுள்ள 'வீர் சிவாஜி' படத்தின் மூலம் 'அஞ்சலி' புகழ் ஷாமிலி கதாநாயகியாக தமிழில் அறிமுகமாகவிருக்கிறார்.