கங்கனாவை பகத் சிங் உடன் ஒப்பிட்ட விஷால்! கலாய்த்து தள்ளும் நெட்டிசன்கள்

பாலிவுட் நடிகை கங்கனா ரனாவத் மற்றும் மகாராஷ்டிரா அரசு இடையேயான பிரச்சனை தொடர்ந்து பெரிதாகி வருகிறது. நேற்று கங்கனாவின் வீடு மற்றும் அலுவலகம் விதிமுறைகளை மீறி மாற்றம் செய்யப்பட்டுள்ளது என கூறி அதனை இடித்து தள்ளினர். அதன் பிறகு நீதிமன்றத்தை நாடிய கங்கனா ரனாவத் அதற்கு தடை உத்தரவு வாங்கினார். ஆனால் அதற்கு முன்பே அவரது அலுவலகம் அதிகம் அளவு இடிக்கப்பட்டு இருந்தது. நீதிமன்ற உத்தரவை அடுத்து இடிக்கும் பணிகள் நிறுத்தப்பட்டு இருப்பதாக அதிகாரிகள் தெரிவித்தனர். இன்று கங்கனா இடிக்கப்பட்ட அலுவகத்துக்கு சென்று பார்வையிட்டார்.

மேலும் மகாராஷ்டிர முதலமைச்சர் உத்தவ் தாக்கரே மீது சமூக வலைதளத்தில் தவறாக பேசினார் என கங்கனா மீது எப்ஐஆர் பதிவு செய்யப்பட்டிருக்கிறது. இதனை போலீசார் விசாரணை நடத்தி வருகின்றனர். மகாராஷ்டிராவை குறிப்பாக மும்பையை பாகிஸ்தான் ஆக்கிரமிப்பு காஷ்மீர் போல இருக்கிறது என கங்கனா குற்றம் சாட்டியிருந்தார். சுஷாந்த் சிங் மரணம் சம்பவத்தை குறிப்பிட்டு அவர் இவ்வாறு பேசி இருந்தார். கங்கானாவின் பேச்சால் சினிமாத் துறையில் சலசலப்பும் மற்றும் அரசியல் உலகத்தில் கடும் எதிர்ப்பும் கிளம்பி இருக்கிறது.

கங்கனாவுக்கு சினிமா நட்சத்திரங்கள் பலரும் ஆதரவு தெரிவித்து வருகிறார்கள். அந்த வரிசையில் தற்போது தமிழ் நடிகர் விஷால் இணைந்திருக்கிறார். அவர் பதிவிட்டு இருக்கும் டுவிட்டில் கூறியிருப்பதாவது..

கங்கனா உங்களது தைரியத்தை நான் பாராட்டுகிறேன். எது சரி எது தவறு என்பதை பற்றி பேசுவதற்காக நீங்கள் மற்ற எதைப் பற்றியும் யோசித்ததில்லை. இது உங்களுடைய சொந்த பிரச்சனை இல்லை, ஆனாலும் நீங்கள் அரசு எதிர்ப்பை சந்தித்து வருகிறீர்கள், ஆனாலும் நீங்கள் மிகவும் வலிமையாக இருந்து மற்றவர்களுக்கு எடுத்துக் காட்டாக இருக்கிறீர்கள். 1920ல் பகத்சிங் போல நீங்கள் செய்து கொண்டு இருக்கிறீர்கள்.

ஒரு விஷயம் தவறாக இருக்கும் போது அரசுக்கு எதிராகவும் குரல் கொடுக்க முடியும் என்பதற்கு இது சிறந்த உதாரணம். இதற்காக பிரபலமாக இருக்க வேண்டிய அவசியமில்லை. சாதாரண மனிதனும் இதை செய்யலாம். Freedom of Speech (Article 19).

உங்களுக்குப் பாராட்டுகள். நான் தலை வணங்குகிறேன்" என அவர் குறிப்பிட்டிருக்கிறார்.


விஷால் இப்படி வெளிப்படையாக கங்கனாவுக்கு ஆதரவு தெரிவித்திருப்பது ட்விட்டரில் வாக்குவாதத்தை கிளப்பி விட்டிருக்கிறது. விஷால் கூறும் கருத்துக்கு எதிராகவும் பலரும் கமெண்ட் செய்து வருகிறார்கள். கங்கனா ஒரு குறிப்பிட்ட கட்சிக்கு ஆதரவாக செயல்பட்டு வரும் நிலையில், விஷாலும் அந்த கட்சியில் சேரப் போகிறாரா என கேள்வி எழுப்பி வருகிறார்கள் நெட்டிசன்கள்.