14 வருடங்கள் ஆச்சு.. சென்னை 28ல் வாய்ப்பு கேட்ட விஷ்ணு விஷால்! தற்போது வெளியிட்ட தகவல்

தற்போது தமிழ் சினிமாவில் முன்னணி நடிகர்களில் ஒருவர் விஷ்ணு விஷால். அவரது படங்கள் வியாபார ரீதியாக நல்ல வரவேற்பை பெறுகின்றன.

இவர் முதலில் அறிமுகம் ஆன படம் வெண்ணிலா கபடி குழு. அந்த படம் நல்ல விமர்சனங்கள் பெற்று ரசிகர்களை கவர்ந்ததால் அதன் பிறகு விஷ்ணுவுக்கு நல்ல பட வாய்ப்புங்கள் அதிகம் வந்தது.

இந்த படத்தில் நடிக்கும் முன்பு விஷ்ணு வாய்ப்பு தேடி சில காலம் அலைந்துள்ளார். அப்போது வெங்கட் பிரபு இயக்குநராக அறிமுகம் ஆன சென்னை 28 படத்தில் நடிக்கவும் வாய்ப்பு கேட்டு சென்றுள்ளார்.

தற்போது சென்னை 28 படம் வெளியாகி 13 ஆண்டுகள் ஆவதை சமூக வலைத்தளங்களில் ரசிகர்கள் கொண்டாடி வருகின்றனர். இந்நிலையில் தான் இந்த தகவலை கூறியுள்ளார் விஷ்ணு விஷால்.

"சார் நம்பவே முடியவில்லை. கிட்டத்தட்ட 14 வருடங்கள் ஆகிவிட்டது நான் உங்களை முதல் முறையாக வாய்ப்பு கேட்டு சந்தித்து. நேரம் ஓடிவிட்டது. சென்னை 28 எப்போதும் தமிழ் ரசிகர்களுக்கு ஸ்பெஷல் படமாக இருக்கும்" என விஷ்ணு தெரிவித்துள்ளார்.

அதற்கு பதில் கூறிய வெங்கட் பிரபு "ஆமாம் ப்ரோ. நேரம் பறந்துவிட்டது. ஆனால் நீங்கள் இதை விட சிறப்பான படமான வெண்ணிலா கபடி குழு மூலமாக சினிமாவில் அறிமுகம் ஆனதில் மகிழ்ச்சி" என தெரிவித்துள்ளார்.