'ஒருமாதத்தில் அரசியலுக்கு வருகிறேன்'- பாக்யராஜ் அறிவிப்பு

நேரடியாக அரசியலுக்கு வரப்போகிறேன். எப்போது என தெரியாது ஆனால் ஒரு மாதத்தில் அரசியலுக்கு வந்துவிடுவேன் என நடிகரும், இயக்குனருமான கே பாக்யராஜ் தெரிவித்துள்ளார்.
தமிழக அரசியலில் முக்கிய புள்ளிகளாக இருந்த ஜெயலலிதா மறைந்த பின்னர், கருணாநிதி உடல் நிலை காரணமாக அரசியலிலிருந்து ஒதுங்கியுள்ள நிலையில், தமிழக அரசியலில் பெரிய வெற்றிடம் நிலவுகின்றது.
இந்த வெற்றிடத்தை நிரப்ப கமல், ரஜினி உள்ளிட்டோர் அரசியலுக்கு வருவார்கள் என அவர்களது ரசிகர்கள் மிக ஆவலோடு எதிர்பார்த்து கொண்டிருந்தனர்.

இந்நிலையில் கமல் தனது டுவிட்டர் மூலம் அரசியல் சார்ந்த கருத்துக்கள் கூறி, பல ஆண்டுகளுக்கு முன்பே அரசியலுக்கு வந்துவிட்டதாக தெரிவித்துள்ளார். ரஜினியோ பல ஆண்டுகளாக அவரின் ரசிகர்களின் கனவை டிசம்பர் 31ம் தேதி அரசியலில் ஈடுபடுவது உறுதி என கூறி நிறைவேற்றியுள்ளார்.

கே பாக்யராஜ் பிரவேசம் :
சினிமா நட்சத்திரங்கள் அரசியலுக்கு வரக்கூடாது என சிலர் கருத்து தெரிவித்து வரும் நிலையில், இயக்குனரும், நடிகருமான கே பாக்யராஜ் நேரடி அரசியலில் ஈடுபடப்போவதாக தெரிவித்துள்ளார்.

கே பாக்யராஜ் கூறியதாவது, “நான் அரசியலுக்கு வர முடிவு செய்துவிட்டேன். அதற்கான வாய்ப்பும், காலமும் நெருங்கிவிட்டது. எப்போது வேண்மானாலும் வரலாம். இப்போதைக்கு எதுவும் சொல்ல முடியாது. கொஞ்சம் அவகாசம் தேவை.



அதற்காக நீண்ட காலம் எல்லாம் கிடையாது. இன்னும் ஒரு மாதத்தில் முடிவு சொல்லிவிடுவேன். யாருக்கு ஆதரவு, ஏன் ஆதரவு என அப்போது சொல்வேன். கொஞ்சம் பொறுத்திருங்கள்.” என தெரிவித்துள்ளார்.