பிரமாண்ட இயக்குநரின் படம் ரிலீஸானால் தியேட்டர்களை கொளுத்துவோம்: பாஜக எம்.பி.

எஸ்.எஸ். ராஜமவுலி இயக்கத்தில் ராம் சரண் தேஜா, ஜூனியர் என்.டி.ஆர். உள்ளிட்டோர் நடித்து வரும் படம் ஆர்.ஆர்.ஆர். அந்த படத்தில் ஜூனியர் என்.டி.ஆரின் கதாபாத்திரமான கொமரம் பீம் குறித்த டீஸர் அண்மையில் வெளியாகி ரசிகர்களை கவர்ந்தது.

RRR Bheem Teaser: மாஸாக வந்த பீம், இன்னொரு பாகுபலினு கொண்டாடும் ரசிகர்கள்: ராஜமவுலிக்கு ஒரு ஹிட் பார்சல்

கொமரம் பீம் தலையில் தொப்பி அணிந்து, கண்களில் சுர்மா போட்டு இஸ்லாமியராக காட்டப்பட்டிருந்தார். அதை பார்த்து ரசிகர்கள் யாரும் எதுவும் தெரிவிக்கவில்லை.

இந்நிலையில் கொமரம் பீமை இஸ்லாமியராக காட்டியதற்கு பாஜக எம்.பி.யும், ஆதிவாசி தலைவருமான சோயம் பாபு ராவ் கடும் எதிர்ப்பு தெரிவித்துள்ளார்.

கொமரம் பீம் பற்றி சோயம் பாபு ராவ் கூறியிருப்பதாவது,

கொமரம் பீமை படத்தில் காட்டுவதில் எங்களுக்கு எந்தவித ஆட்சேபனையும் இல்லை. ஆனால் நீங்கள் ஆதிவாசிகளின் மனதை புண்படுத்தினால் சும்மா இருக்க மாட்டோம். ஆதிவாசிகளால் முடிந்ததை செய்யட்டும், நான் விரும்புவதை தான் செய்வேன் என்று ராஜமவுலி இருந்தால் கடும் பின்விளைவுகளை சந்திக்க வேண்டி இருக்கும்.

கொமரம் பீம் ஒரு இந்து. ஆர்.ஆர்.ஆர். படத்தை ரிலீஸ் செய்ய விட மாட்டோம். மீறி ரிலீஸ் செய்தால் வரலாற்றை திரித்து, கொமரம் பீமை இஸ்லாமியராக காட்டுவதற்காக ஆர்.ஆர்.ஆர். படம் ஓடும் தியேட்டர்களை கொளுத்தவும் தயங்க மாட்டோம் என்றார்.

ஆர்.ஆர். ஆர். படத்தின் 40 சதவீத படப்பிடிப்பு முடிந்துவிட்டது. இன்னும் 60 சதவீத காட்சிகளை படமாக்க வேண்டியுள்ளது. கொமரம் பீமை இஸ்லாமியராக காட்டுவது தவறு என்று சமூக வலைதளங்களில் ஒரு சிலர் எதிர்ப்பு தெரிவித்து வந்தனர். இந்நிலையில் பாஜக எம்.பி. மிரட்டல் விடுத்திருப்பது பரபரப்பை ஏற்படுத்தியுள்ளது.

ஹைதராபாத்தில் நிஜாம்களின் ஆட்சிக்கு எதிராக போராடியவர் கொமரம் பீம். தன் சமூகத்தை அடக்கி ஒடுக்கியதற்காகவும், அதிகமாக வரி விதித்ததற்கு எதிராகவும் கொமரம் பீம் போராடினார். கொமரம் பீம் கடந்த 1940ம் ஆண்டு அக்டோபர் மாதம் 27ம் தேதி நிஜாம் ராணுவத்தால் கொலை செய்யப்பட்டார்.

ஆர்.ஆர்.ஆர். படத்தை 2021ம் ஆண்டு ஜனவரி மாதம் 8ம் தேதி ரிலீஸ் செய்ய திட்டமிட்டிருந்தார் ராஜமவுலி. ஆனால் கொரோனா வைரஸ் பிரச்சனை விஸ்வரூபம் எடுத்ததால் திட்டமிட்டபடி படப்பிடிப்பை நடத்த முடியவில்லை. ஆர்.ஆர். ஆர். படத்தை தெலுங்கு, தமிழ் உள்பட 10 இந்திய மொழிகளில் வெளியிட திட்டமிட்டுள்ளார்கள்.