யோகி பாபு
யோகி பாபுவுக்கும், மஞ்சு பார்கவி என்பவருக்கும் கடந்த பிப்ரவரி மாதம் குலதெய்வம் கோவிலில் வைத்து எளிமையாக திருமணம் நடந்தது. திருமணத்திற்கு யாரையும் அழைக்க முடியாமல் போனது என்று கூறினார் யோகி பாபு. தனக்கு திருமணம் நடந்தபோது எடுத்த புகைப்படத்தை சமூக வலைதளத்தில் வெளியிட்டு சென்னையில் பிரமாண்டமாக வரவேற்பு நிகழ்ச்சி நடக்கும் என்றார். ஆனால் கொரோனா பிரச்சனையால் திருமண வரவேற்பு நிகழ்ச்சியை நடத்தவில்லை.
மகத்
பிக் பாஸ் 2 புகழ் மகத் தன் காதலியான பிராச்சி மிஸ்ராவை பிப்ரவரி மாதம் திருமணம் செய்து கொண்டார். அந்த திருமணத்தில் இருவீட்டாரும், திரையுலகை சேர்ந்த சிம்பு, அனிருத் உள்ளிட்ட ஒரு சில நெருங்கிய நண்பர்கள் மட்டுமே கலந்து கொண்டனர். பல ஆண்டுகளாக காதலித்து வந்த மகத்துக்கும், பிராச்சிக்கும் கடந்த ஆண்டு நிச்சயதார்த்தம் நடந்தது.
ராணா
நான் மிஹீகா பஜாஜ் என்பவரை காதலிக்கிறேன் என நடிகர் ராணா மே மாதம் ட்வீட் செய்தார். இதையடுத்து இருவீட்டாரும் சந்தித்து பேசி நிச்சயதார்த்தம் நடந்தது. அதன் பிறகு கடந்த ஆகஸ்ட் மாதம் 8ம் தேதி ஹைதராபாத்தில் இருக்கும் ராமநாயுடு ஸ்டுடியோஸில் ராணா, மிஹீகாவின் திருமணம் நடந்தது. கொரோனா வைரஸ் பிரச்சனையால் திருமணத்தில் இரு வீட்டாரும், நண்பர்கள் சிலரும் தான் கலந்து கொண்டு மணமக்களை வாழ்த்தினார்கள்.
காஜல் அகர்வால்
காஜல் அகர்வால் மும்பையை சேர்ந்த தொழில் அதிபர் கவுதம் கிட்ச்லுவை காதலித்து வந்தார். இந்நிலையில் கடந்த அக்டோபர் மாதம் 30ம் தேதி மும்பையில் இருக்கும் ஸ்டார் ஹோட்டல் ஒன்றில் அவர்களின் திருமணம் நடந்தது. திருமணம் முடிந்த மறுநாளே கணவருடன் புதுவீட்டில் குடியேறினார். அதன் பிறகு கவுதமுடன் மாலத்தீவுகளுக்கு தேனிலவுக்கு சென்றார். தேனிலவில் இருந்து நாடு திரும்பியதும் படங்களில் கவனம் செலுத்தி வருகிறார் காஜல் அகர்வால்.
மியா ஜார்ஜ்
நேற்று இன்று நாளை படம் புகழ் மியா ஜார்ஜுக்கும், அஸ்வின் ஃபிலிப் என்பவருக்கும் கொச்சியில் உள்ள தேவாலயம் ஒன்றில் கடந்த செப்டம்பர் மாதம் 12ம் தேதி திருமணம் நடந்தது. திருமணத்தில் 20 பேர் மட்டுமே கலந்து கொண்டார்களாம். கொரோனா வைரஸ் பிரச்சனையால் கூடுதல் நபர்கள் கலந்து கொள்ள அனுமதி கிடைக்கவில்லையாம்.
சனா கான்
சிம்புவின் சிலம்பாட்டம் உள்ளிட்ட படங்களில் நடித்த சனா கான் தான் திரையுலகில் இருந்து விலகுவதாக அக்டோபர் மாதம் அறிவித்தார். நடிப்புக்கு முழுக்கு போட்ட கையோடு மத போதகரான அனஸ் செய்யது என்பவரை திருமணம் செய்து கொண்டார். திருமணத்தின்போது எடுக்கப்பட்ட புகைப்படங்கள், வீடியோக்கள் சமூக வலைதளங்களில் வெளியாகி வைரலானது. அல்லாஹ்வுக்காக அனஸை திருமணம் செய்து கொண்டதாக தெரிவித்தார் சனா கான்.