தனுஷ் வசனத்தை காப்பியடித்து ’ஜீரோ’ படத்தில் பேசும் ஷாருக்கான்

ஷாருக்கான் நடிப்பில், பாலிவுட்டில் விரைவில் வெளிவரவுள்ள ’ஜீரோ’ படத்தில், தமிழில் தனுஷ் பேசி நடித்த ஒரு வசனம் இடம்பெற்றிருப்பது ஆச்சர்யத்தை கிளப்பியுள்ளது.

இந்தியில், வரும் டிசம்பர் 21ம் தேதி வெளிவரும் ’ஜீரோ’ திரைப்படம் இந்திய ரசிகர்கள் மத்தியில் பெரிய எதிர்பார்ப்பை ஏற்படுத்தியுள்ளது. ஷாருக்கான் ஹீரோவாக நடித்துள்ள இந்த படத்தில் அனுஷ்கா ஷர்மா, கத்ரீனா கைஃப் உள்ளிட்டோர் முக்கிய கதாபாத்திரங்களில் நடித்துள்ளனர். மேலும் மறைந்த நடிகை ஸ்ரீதேவி கடைசியாக நடித்த படமாகவும் இது உள்ளது.


’ஜீரோ’ படத்தில் நடித்துக்கொண்டிருந்த போது தான், நடிகை ஸ்ரீதேவியின் எதிர்பாராத மரணம் நிகழ்ந்தது. இந்நிலையில் அவர் நடிக்கவேண்டிய மீதி காட்சிகளை, கிராஃபிக்ஸ் ஸ்ரீதேவியை உருவாக்கி, அதை படத்தில் இடம்பெறச் செய்துள்ளனர். சமீபத்தில் ‘ஜீரோ’ படத்தின் புதிய ப்ரோமோ வெளிவந்துள்ளது. இதுவரை 15 லட்சம் பார்வையாளர்களை கடந்துள்ள இந்த ப்ரோமோ வீடியோவில் பேசும் ஷாருக்கான், தமிழில் ‘படிக்காதவன்’ படத்தின் தனுஷ் பேசிய வசனத்தை பேசி நடித்துள்ளார்.

ப்ரோமோ வீடியோவில் அனுஷ்கா ஷர்மாவை பார்த்து பேச்சும் சித்தரக்குள்ளன் ஷாருக்கான், ‘ஹம் ஜெய்சே லோண்டோ சே தேக்கே பியார் நஹி ஹோத்தா பஹன் ஜி தேக்தே தேக்தே ஹோ ஜாத்தா ஹை’ என்று கூறுகிறார். இதற்கு தமிழில் ‘என்ன மாதிரி பசங்களை பார்த்தா புடிக்காது, பார்க்க பார்க்க தான் புடிக்கும்’ என்று அர்த்தம். இதே வசனத்தை ‘படிக்காதவன்’ படத்தில் தன்னை வெறுத்து ஒதுக்கும் தமன்னாவை பார்த்து தனுஷ் பேசுவார்.


எப்போதும் தமிழக ரசிகர்கள் ஷாருக்கான் நடிக்கும் படத்தை கண்டுக்கொள்ள மாட்டார்கள். அவருடைய படங்கள் ஹிட்டானால் மட்டுமே இங்கே வரவேற்பு பெறும். இந்நிலையில், தனுஷின் வசனத்தை ஷாருக்கான் பேசி நடித்துள்ள நிலையில், ‘ஜீரோ’ படம் தமிழக ரசிகர்கள் மத்தியிலும் பெரிய எதிர்பார்ப்பை கிளப்பியுள்ளது. நடிகர் தனுஷ் நடித்து பாலிவுட்டில் வெளியான முதல் படம் ‘ராஞ்சானா’. இந்த படத்தை ஆனந்த் எல். ராய் இயக்கியிருந்தார். இவர்தான் தற்போது ‘ஜீரோ’ படத்தையும் இயக்கியுள்ளார் என்பது குறிப்பிடத்தக்கது.