வீரன் விமர்சனம்
ஆதி,ஆதிரா ராஜ்,முனிஷ்காந்த்
Samayam Tamil 2 Jun 2023, 3:21 pm
வீரனூர் கிராமத்தை சேர்ந்தவர் குமரன்(ஹிப்ஹாப் தமிழா ஆதி). சிறுவனாக இருக்கும்போது குமரனை மின்னல் தாக்குகிறது. இதையடுத்து சுயநினைவை இழந்த குமரனை மேல் சிகிச்சைக்காக சிங்கப்பூருக்கு அனுப்பி வைக்கிறார் அப்பா.
சுமார் 16 ஆண்டுகள் கழித்து தன் சொந்த ஊருக்கு திரும்பி வருகிறார் குமரன். ஆனால் வீரனூரில் இருந்து சென்ற அதே குமரனாக அவர் திரும்பி வரவில்லை. மின்னல் தாக்கியதால் அவருக்கு சில சூப்பர் சக்திகள் கிடைத்திருக்கிறது.
தனக்குள் மின்னலின் சக்தி இருப்பதை உணர்கிறார் குமரன். அவரால் தன் சக்தியை வைத்து அடுத்தவர்ளின் மூளையை கட்டுப்படுத்த முடியும்.
இந்நிலையில் வில்லன் வினய் ஒரு மாபெரும் திட்டத்துடன் வீரனூருக்கு வருகிறார். அவரின் லேசர் கேபிள் திட்டத்தால் பல உயிர்களுக்கு ஆபத்து ஏற்படக்கூடும். வீரனூர் மக்கள் அந்த திட்டத்திற்கு எதிர்ப்பு தெரிவிக்கிறார்கள்.
வினய்யின் திட்டம் நிறைவேறுமா, அவரை குமரன் தடுத்து நிறுத்தி தன் ஊர் மக்களை காப்பாற்றுவாரா என்பதே கதை.
ஏ.ஆர்.கே. சரவணன் இயக்கியிருக்கும் வீரன் படம் சூப்பர் ஹீரோ ஃபேன்டஸி உலகத்திற்கு நம்மை கொண்டு செல்கிறது. பிற சூப்பர் ஹீரோ படங்களில் தங்களுக்கு ஸ்பெஷல் சக்தி இருப்பதை ஹீரோக்கள் உணர நேரம் எடுக்கும். ஆனால் வீரனில் அப்படி இல்லை. தனக்கு வரும் கனவு மூலம் தான் சாதாரண ஆள் இல்லை என்பது குமரனுக்கு ஆரம்பத்திலேயே தெரிகிறது.
கதையை படமாக்கிய விதம் நன்றாக இருக்கிறது. தன் சக்தியால் பிறரின் மூளையை குமரான் கட்டுப்படுத்துவது போன்று காட்டியிருப்பது நம்பும்படி இருக்கிறது.
கிளைமாக்ஸ் காட்சியில் இன்னும் கொஞ்சம் கவனம் செலுத்தியிருந்திருக்கலாம். முனிஷ்காந்த், காளி வெங்கட் உள்ளிட்டோரின் காமெடி காட்சிகள் ரசிக்கும்படி இருக்கிறது.
சூப்பர் ஹீரோவாக நம்பும்படி நடித்திருக்கிறார் ஹிப்ஹாப் தமிழா ஆதி. ஆதிரா ராஜ் தனக்கு கொடுத்த வேலையை கச்சிதமாக செய்திருக்கிறார். வில்லன் வினய்யை இன்னும் கொஞ்சம் சக்திவாய்ந்தவராக காட்டியிருக்கலாம். ஹிப்ஹாப் தமிழாவின் இசை படத்திற்கு பக்கபலம்.
வீரன்- தாராளமாக பார்க்கலாம்.
Latest Kollywood News | Cinema News | Tamil Movie Review