Best Jokes : ஓ! குவா! குவா ஆகிய இவற்றிடம் சிறிது கவனமாக இருக்க வேண்டும்!

அமைச்சர் ஒருவர் மலை வாழ் மக்கள் வாழும் பகுதிக்கு முதன் முறையாகச் சென்றிருந்தார். அவரைப் பார்ப்பதற்காகக் கூட்டம் கூடியது.

கூட்டத்தினரைப் பார்த்து ஆரவாரமாகப் பேசத் தொடங்கினார்.

"உங்களுக்குத் தேவையான உதவிகளை இந்த அரசு செய்யும். அதற்கு நான் உறுதி தருகிறேன்" என்றார்.

கூட்டத்தினர் "ஓ! குவா! குவா!" என்று உரத்த குரல் எழுப்பினார்கள்.

"நல்ல பள்ளிக்கூடம் இங்கே அமைய நான் முயற்சி செய்கிறேன்" என்றார்.

கூட்டத்தில் "ஓ! குவா! குவா!" என்ற முழக்கம் எழுந்தது.

"இங்கே சிறந்த மருத்துவ மனை அமைக்கப் பாடுபடுவேன்" என்றார்.

"ஓ! குவா! குவா!" என்று கூட்டத்தினர் முழங்கினார்கள்.

மகிழ்ச்சி அடைந்த அவர் "உங்கள் ஒவ்வொருவருக்கும் வீடு கட்டித் தர ஏற்பாடு செய்கிறேன்" என்றார்.

கூட்டத்தினர் வழக்கம் போல் "ஓ! குவா! குவா!" என்று கத்தினார்கள்.

கூட்டம் ஒரு வழியாக முடிந்தது.

பேசி முடித்த அவர் அங்கிருந்த பெரியவர்கள் சிலருடன் மலைப் பகுதியைச் சுற்றிப் பார்க்கப் புறப்பட்டார்.

சிறது தூரத்தில் மேய்ந்து கொண்டிருந்த காட்டெருமைகள் அவர் கண்களுக்குத் தெரிந்தன.

பக்கத்தில் இருந்த பெரியவரிடம் "நான் அருகே சென்று அவற்றைப் பார்க்கலாமா? ஆபத்து வராதே" என்று கேட்டார் அவர்.

அந்தப் பெரியவர் "அருகே செல்லலாம் ஓ! குவா! குவா ஆகிய இவற்றிடம் சிறிது கவனமாக இருக்க வேண்டும்" என்றார்.