ஆண்டுக்கு ரூ.4,575 கேஷ்பேக்! பிஎஸ்என்எல் அதிக வேலிடிட்டி ஆஃபர்கள்

ஆண்டுக்கு ரூ. 4,575 வரை கேஷ்பேக் வழங்கும் நீண்ட வேலிடிட்டி கொண்ட சலுகைகளை பிஎஸ்என்எல் நிறுவனம் அறிவித்துள்ளது.

ரிலையன்ஸ் ஜியோ, ஏர்லெட், வோடபோன் ஐடியா ஆகிய தனியார் தொலைத்தொடர்பு நிறுவனங்களுடன் போட்டியிட்டு பொதுத்துறை நிறுவனமான பிஎஸ்என்எல் நிறுவனமும் அதிக ஆஃபர்களை கொடுத்துவருகிறது.

இப்போது போஸ்ட்பெய்டு வாடிக்கையாளர்களை அசத்த நீண்ட வேலிடிட்டி கொண்ட புதிய சலுகைகளை அறிவித்துள்ளது. இதன்படி மாதம்தோறும் ரூ.1,525 கட்டணம் செலுத்தும் போஸ்ட் பெய்ட் வாடிக்கையாளர்கள் 12 மாதங்களுக்கான கட்டணத்தை முன்கூட்டியே செலுத்தினால், 25% கேஷ்பேக் கிடைக்கும். அதாவது ரூ.1,525 கட்டண திட்டத்தில் இருப்பவர்கள் மொத்தமாக 18,300 ரூபாயை 12 மாதங்களுக்குச் சேர்த்துக் கட்டினால், ரூ.4,575 கேஷ்பேக் பெறலாம்.

இதேபோல, ரூ.1,125 மற்றும் ரூ.799 மாதக் கட்டணத்தில் இருக்கும் போஸ்ட் பெய்ட் வாடிக்கையாளர்களும் 12 மாதங்களுக்கான கட்டணத்தை முன்கூட்டியே செலுத்தி 25% கேஷ்பேக் பெறலாம். ரூ.725 மற்றும் ரூ.535 மாதக் கட்டணம் செலுத்திவரும் போஸ்ட் பெய்ட் வாடிக்கையாளர்கள் 12 மாதங்களுக்கான கட்டணத்தை முன்கூட்டியே செலுத்தினால், 20% கேஷ்பேக் பெறலாம். ரூ.399, ரூ.325 மற்றும் ரூ.225 மாதக் கட்டணம் செலுத்திவருவோர் 12 மாதங்களுக்கான கட்டணத்தை முன்கூட்டியே செலுத்தினால், 10% கேஷ்பேக் பெறலாம்.

ஆறு மாத கட்டணத்தை முன்கூட்டியே செலுத்தும் போஸ்ட் பெய்ட் வாடிக்கையாளர்களுக்கும் இதே போன்ற சலுகை உள்ளது. இதில் ரூ.1,525, ரூ.1,125 மற்றும் ரூ.799 கட்டணம் செலுத்துவோருக்கு 12% கேஷ்பேக் கிடைக்கும். ரூ.725 மற்றும் ரூ.535 கட்டணம் செலுத்துவோருக்கு 8% கேஷ்பேக் கிடைக்கும். ரூ.399, ரூ.325 மற்றும் ரூ.225 கட்டணம் செலுத்துவோருக்கு 4% கேஷ்பேக் கிடைக்கும்.

ஆனால், இந்த சலுகைகளால் அதிகம் பேருக்கு எந்த பிரயோஜனமும் இருக்கப் போவதில்லை. ஏனென்றால் இவை அனைத்தும் கேரளாவில் மட்டுமே வழங்கப்படுதவாகத் தெரிகிறது.

கடந்த டிசம்பர் 18ல் பிஎஸ்என்எஸ் பிராட்பேண்ட் திட்டங்களுக்கும் இதே போன்ற 25% கேஷ்பேக் சலுகையை அறிவித்தது குறிப்பிடத்தக்கது.