டிராய் சோதனையில் தொடர்ந்து வோடபோனிடம் தோற்கும் ஜியோ

டிராய் நடத்திய 4G சோதனையில் ரிலையன்ஸ் ஜியோ நிறுவனம் தொடர்ந்து வோடபோன் நிறுவனத்திடம் தோல்வி அடைந்துள்ளது.

டிராய் எனப்படும் தொலைத்தொடர்பு ஒழுங்குமுறை ஆணையம் (TRAI) மார்ச் மாதத்துக்கான 4G இன்டர்நெட் ஸ்பீடு சோதனையை நடத்தியுள்ளது. இதில் ரிலையன்ஸ் ஜியோவின் டவுன்லோட் ஸ்பீடு (Download Speed) விநாடிக்கு 22.2 Mbps ஆக இருந்திருக்கிறது.

ஏர்டெல், வோடபோன் ஐடியா போன்ற ஜியோவின் போட்டியாளர்கள் யாரும் ஜியோவின் வேகத்துக்கு பக்கத்தில்கூட வரவில்லை. ஏர்டெல் டவுன்லோடு ஸ்பீடு விநாடிக்கு 9.3 Mbps மட்டுமே. ஜியோவின் ஸ்பீடு இதைவிட கிட்டத்தட்ட இரு மடங்காக உள்ளது.

வோடபோன் மற்றும் ஐடியாவின் டவுன்லோடு ஸ்பீடு 7 Mbps மற்றும் 5.6 Mbps ஆக இருந்துள்ளது. ஆனால், அப்லோடு ஸ்பீடு (Upload Speed) சோதனையில் வோடபோன் நிறுவனம் முதல் இடத்தைப் பெற்றிருக்கிறது. அதன் அப்லோடு ஸ்பீடு விநாடிக்கு 6 Mbps. விநாடிக்கு 5.5 Mbps அப்லோடு ஸ்பீடு கொண்ட ஐடியா இரண்டாம் இடம் பிடித்துள்ளது. ஜியோ விநாடிக்கு 4.6 Mbps மற்றும் ஏர்டெல் விநாடிக்கு 3.6 Mbps வேகத்துடன் மூன்றாவது மற்றும் நான்காவது இடங்களைப் பிடித்தன.

ஐடியா மற்றும் வோடபோன் நிறுவனங்கள் இணைக்கப்பட்டிருந்தாலும் தனித்தனியாகவே சோதனை செய்யப்பட்டிருக்கிறது. பிப்ரவரி மாதத்தைப் போலவே மார்ச் மாதமும் அப்லோடு ஸ்பீடில் ஜியோ வோடபோனிடம் தோற்றுவிட்டது. ஜியோ டவுன்லோட் ஸ்பீடில் நன்றாக முன்றேறி, முதல் இடத்திலேய உள்ளது.