Kerala Floods: வெள்ளத்தால் பாதிக்கப்பட்ட போன்களுக்கு இலவச சர்வீஸ்- ஹூவாய் அறிவிப்பு

கேரள மழை வெள்ளத்தில் பாதித்த ஸ்மார்ட்போன்களை இலவசமாக சரி செய்து தருவதாக ஹூவாய் நிறுவனம் அறிவித்துள்ளது.

கடந்த 100 ஆண்டுகளில் இல்லாத வகையில் கேரளாவில் கனமழை காரணமாக வெள்ளம், நிலச்சரிவு போன்றவை ஏற்பட்டு அம்மாநிலம் மிகக் கடுமையாக பாதிக்கப்பட்டது.

இப்போது தான் கொஞ்சம், கொஞ்சமாக நிலைமை அங்கு சீராகி வருகிறது. வெள்ள பாதிப்பில் இருந்து அம்மாநில மக்களை மீட்க பல்வேறு தரப்பில் இருந்தும் உதவிகள் குவிந்து வருகின்றன.

இந்நிலையில், மழை வெள்ளத்தில் பாதிக்கப்பட்டு பாழாகிய ஸ்மார்ட்போன்களை இலவசமாக சரி செய்து வழங்குவதாக ஹூவாய் நிறுவனம் அறிவித்துள்ளது.

மாநிலம் முழுக்க இயங்கி வரும் சர்வீஸ் மையங்களில் உதிரி பாகங்கள் தேவையான அளவு இருப்பதை உறுதி செய்யும் வகையில் தொழில்நுட்ப குழுக்களை பிரத்யேகமாக அந்நிறுவனம் நியமித்துள்ளது.

வாடிக்கையாளர்கள் ஹூவாயின் இலவச அழைப்பு எண் - 1800-209-6555 தொடர்பு கொண்டு இலவசமாக சரி செய்து கொள்ளலாம். இந்த இலவச சர்வீஸ்கள் ஆகஸ்டு 31-ஆம் தேதி வரை கிடைக்கும் என்று தெரிவிக்கப்பட்டுள்ளது.