16 கோடி டப்ஸ்மாஷ் பயனாளர்கள் பற்றி அனைத்து விவரங்களும் விற்பனைக்கு!

அடையாளம் தெரியாத ஹேக்கர் டப்ஸ்மாஷ் போன்ற உலக அளவில் அதிகம் பயன்படுத்தப்படும் 30க்கு மேற்பட்ட இணையதளங்களை ஹேக் செய்து அவற்றை விற்பனை செய்கிறார்.

போதைப் பொருட்கள், கள்ள நோட்டுகள் போன்ற சட்டவிரோதமான பொருட்களை ரகசியமாக விற்க வழிவகை செய்யும் இணையதளங்கள் சில உள்ளன. அவை பொதுவாக Darknet Market என அழைக்கப்படுகின்றன. இப்படிப்பட்ட இணையதளங்களில் ஒன்று Dream Market.

இந்த இணையதளத்தில் அடையாளம் தெரியாத நபர் 30க்கு மேற்பட்ட மிகப் பிரபலமான இணையதளங்களை ஹேக் செய்து அதனை பயன்படுத்தும் அனைத்து வாடிக்கையாளர்கள் பற்றிய முழுமையான விவரங்களை விற்பனைக்கு வைத்துள்ளார்.

டப்ஸ்மாஷ் (Dubsmash), 500px, MyFitnessPal, Animoto உள்ளிட்ட பல தளங்கள் ஹேக் செய்யப்பட்டு அதிலிருந்து அனைத்து பயனாளர்கள் பற்றிய தகவல்களும் திருடப்பட்டுள்ளன. குறிப்பாக கடந்த ஒரு வாரத்தில் 750 மில்லியன் தரவுகள் 24 இணையதளங்களிலிருந்து திருடப்பட்டுள்ளன.

இந்த இணையதளங்களின் பயனாளர்களின் பெயர், பாஸ்வேர்டு, ஈமெயில் முகவரி, மொழி, நாடு போன்ற தகவல்கள் விற்பனைக்கு இருக்கின்றன. அனைத்தும் தகவல்களையும் பிட்காயின் மூலம் விலை கொடுத்து வாங்கலாம்.

உதாரணமாக டப்ஸ்மாஷ் தகவல்களின் விலை 0.549 BTC. அதாவது 1.41 லட்சம் ரூபாய். இந்த விலை கொடுத்து வாங்கும் தரவுகளின் அளவு 11GB! இதில் 16 கோடிக்கு மேற்பட்ட டப்ஸ்மாஷ் பயனாளர்களின் தகவல்கள் அடங்கும்! இவை அனைத்தும் டிசம்பர் 2018 வரை எடுக்கப்பட்டவை.